Joba tõist kõrda peeti Võromaa arõnduskeskusõ ja Võromaa ja Setomaa nuurikeskuisi iistvidämisel Võro-Seto Nuurifesti. Timahava tulti kokko 9. ja 10. süküskuul Verskan, et tüütarrin ja pidoõdagul võro ja seto kultuurist häädmiilt tunda ja vahtsit tutvit ja sõpru löüdä.
Ku minevä aasta peeti edimäne festival Võromaal Varstun, sis timahava saadi kokko Setomaal Verskan. Festivalist võtt’ ossa pia 40 nuurt, lisas viil nuuritüütäjä ja kõrraldaja. Inämbüs tegemiisi oll’ Verska gümnaasiumin, a kävvü sai ka Verska nuurikeskusõn, rahvamajan ja puhkõkeskusõn Seto Man.
Et noorõ ütitsit asjo tennü, olli festivalilõ plaanitu tüütarõ. Nii sai näütüses tetä seto süüke ja nuu peränpoolõ är kah süvvä. Üten sai lüvvä DJ opitarõn, kon näpiti muudsit DJ-pultõ ja mängiti muusikat. Parkuuri opitarõ vei huvilidsõ gümnaasiumi taadõ pedäjide ala, kon tull’ minnä müüdä spets-rata ja ettetulõvist esimuudu takistuisist üle saia.
Õdaku minti ütenkuun gümnaasiumi mant rahvamaja mano. Sääl opas’ Leima Evelin seto tandsu ja Laube Kadri Võromaa rahvalaulu.
Ku tandsu-laulu selge, astsõ üles tunnõt ansambli Zetod. Bänd miildü kõigilõ väega ja saalin ollõn võisõ tunda ja kuulda, et seto noorõ mõistva pääst vist kül kõiki Zetodõ laulõ. Pääle näide suurhiti «Kergotaminõ» oll’ väega populaarnõ laul sitalaotamisõst. Õdagu lõpõt’ üüpido.
Tõõnõ festivalipäiv tõi noorõ kokko ütenhaardvalõ mõttõtalgolõ, kon kõnõldi positiivsõst mõtlõmisõst ja tuust, kuimuudu tetä umast hobist hindäle ammõt. Mõttõtalossõ juhendaja kõnõli umast kogõmusõst ja anni noorilõ soovituisi. Noorõ saiva ka ummi arvamiisi ja mõttit vällä kävvü. Jutu seen tull’ vällä, et elon om võimalik jäiä positiivsõs, ku lövvat egäst as’ast midägi hääd. Niisama tulõ sis, ku mõni asi kehväste lätt, olokõrd läbi märgota ja uuri, mis asi ja mille kehväste läts’ ja kuimuudu tuud paranda saanu. Kimmäle ei või jäiä minevikku pasma, kuigimuudu tulõ iks edesi minnä.
Tuust, kuis hobist ammõt võinu saia, kõnõldi kah. Soovitõdi pruuvi pall’o mitmõsugumaidsi asju ja mõtõlda suurõlt. Veidemb tähtsä ei olõ tuu, et esi piät iks kah pall’o tüüd tegemä ja vaiva nägemä, et unistus täüde lännü.
Jäi festivaliga väega rahulõ, kuigi võro ja seto keelen olõs võinu rohkõmb kõnõlda. Kimmäle ooda joba tulõva aasta festivali, miä peetäs jälki Võromaal.
Rahmani Elo
Seto söögi opitarõ. Luigasõ Inara oppusõ perrä tetti rõõmsa meelega häid süüke, miä perän ka ütenkuun nahka pisteti. Rahmani Elo pilt
