Seo nime kandjit om Eestin parhilla 61. Alla kuvvõ kandja om sama nime kujul Tannilson, miä oll’ õkva pääle nimepandmist seo nime kiräkuju Rõugõ keriguraamatidõ perrä. Nimi panti täämbädsest Eesti-Läti piirist napilt Eesti poolõ pääl – Vana-Laitsna mõisa Kilomani (Puurna) külän. Vana-Laitsna hingelugõmiisi om mukav kaia Läti aoluuarhiivist Raduraksti, minka pruukjanime ja salasõna saa egäüts hindäle tetä.
1826. aastaga hingelugõmisõ perrä saiva priinime Dannilsohn Kilomani talurühmä Puurna Tanila (1749–1819) perrätulõja, a sõski viil ka Tanila katõ velle poigõ perre, kõik hingelugõmisõn Kilomani talu all. Talu peremehe, Tanila poja Piitre edimäne poig oll’ kah Tannil, vana Tanila esä oll’ jälleki Piitre, a tä vanaesä edenimme olõ-i teedä. Või arvada, et priinimi, ku taa 1822. aastaga paiku panti, pantigi mõni aastak varõmb koolnu Puurna Tanila perrä. Hingelugõmisin om tedä kirutõt nimekujjõga Tanni, Dani ja Dannil. Sama priinime saiva ka 1826. aastagal peremehe Piitre veli Jaan ja lelläpoja, Jakob Piitre poig ja Tannil Juhani poig.
Puurna Tanilal oll’ pääle Piitre ja Jaani viil üts poig Juhan, kelle nime löüd hoobis Räpinä personaalraamatust 1816–1831 (Dannilsohn, Borna Tannil Juhhan) ja kiä pandsõ alussõ suguvõsa harulõ Põlva kihlkunnan Kauksin.
Nimi Danilson, mis tähendäski ’Tanila poig’, tulõ edenimest Tannil. Algnimi om vana tõstamendi Taaniel ~ Daniel. Timä elust kõnõlas Taanieli raamat, a vanan tõstamendin om ka tõisi tegeläisi heebreä nimega Daniel, miä tähendäs ’mu kohtumõistja om jummal’. Seo, et Võrumaa nimen olõ-i ie-d, tulõ piiblinime vinne kujust Daniil. Edenime Võrumaa kujjõs omma viil Tani ja Tann’o.
Kõik seo nime eestistämise olli Võrumaal. Sõs vahetõdi nimi Danilson nimmis Taniste Erästvere ja Tsooru vallan, nimes Lepa Tsoorun, nimes Tahtjärv Haani vallan. Nimest kujuga Dannilso(h)n sai niisamatõ Taniste Erästveren, Tanilsoo ja Vaikla Laitsna-Rogosi vallan, Laanoja Pindi vallan. Nimi kujuga Tannilson vahetõdi nimes Eelmäe Laitsna-Rogosi vallan. Ütestainukõsõst eestistämise aktist peri nimel Tanilsoo om kah peris hulga kandjit – 24.
Saarõ Evar
Rubriigin kõnõldas perekunnanimmi periolõmisõst ja tähendüsest.
