Seo nätäl peeti oppajidõ päivä. Uma Leht tekk’ tuul puhul juttu Vilustõ kooli 29aastadsõ oppaja Saarõ Hedyga, kiä and aoluu, ütiskunnaoppusõ ja eesti keele tunnõ.
Aoluuoppajana mõist Hedy tähtsäs pitä kooli pikkä aoluku. «Vilustõn om kuul olnu joba aastast 1769. Ku mõtõlda, kuna meil oll’ edimäne laulupido, sõs tan oll’ kuul joba sada aastakka varramba,» tuu tä näüte. Täämbä opp Vilustõ koolin 104 opilast.
Et Hedy eläs maal, om timä jaos loomulik, et tä om maakoolin oppaja. «Ma olõ-i kunagi tahtnu liinah ellä. Niipall’o ku ma liinah koolih käve, mullõ sukugi es miildü tuu elo sääl. Kipõ ja larmi täüs, määnestki luudust ei olõ,» löüd Saarõ Hedy. Tä tunnistas, et maakoolin omma latsõ tõistmuudu. «Maakooli latsil omma lahkõ ja hää silmä. Ku vikur vai krutsk ka tulõ, sis tuu olõ-i sukugi halvaga tettü, a lihtsäle juhtus. Latsõ omma maalähküdse, tiidvä elost ütte ja tõist iks rohkõmb ku liinakooli latsõ.»
Tuu, et Hedy om küländ nuur koolioppaja, om tälle koolilatsiga läbisaamisõ man abis. «Nä tundva hinnäst veidü vabambalt, kaesõ minno säändside rõõmsidõ silmiga, julgusõ iks rohkõmb nall’a tetä. Ja näil om julgust tulla ütlemä, et vot, oppaja, täämbä om tuu nii hää ja tuu om nii halv,» seletäs Hedy.
Oppajidõ päävä aigu püüdvä opilasõ oppajalõ kah häädmiilt tetä. «Mino kõgõ ägedämb oppajidõ päiv oll’ paar aastakka tagasi, ku üts tütärlats tsehkend’ must portree. Ma kae tuu pildi päält hinnäst ja mõtlõ, et tuu olõ täpsele ma. Et tä om täpsele minno är tabanu – säänemääne nigu ma olõ.»
Saarõ Hedy opilasõ omma mitmõl aastal saatnu ummi võrokeelitsit juttõ Uma Lehe jutuvõistlusõlõ ja Mino Võromaa konkursilõ. Hedy esi om kah kooliaol võrokeelitsist võistluisist ossa võtnu ja noist härgütüst saanu, no pruuv tä uma keele pisiläst opilaisilõ edesi anda. «Ku ma näidega võro keeleh tüüd tii, sõs näile umbõlõ miildüs, et om midägi tõistmuudu, om midägi vahvat ja peräh saa kittä kah.»
Oppajidõ palga kotsilõ löüd Saarõ Hedy, et raha om muidoki tähtsä, a kõgõ tähtsämb om, et tüü oppajalõ miildünü. «Ku tüü ei miildü, sõs tä nakaki-i miildümä ja tuud ei massa määndsegi rahaga kinni,» löüd tä.
Rahmani Jan
Nuur oppaja Saarõ Hedy and Vilustõ koolin aoluu, ütiskunnaoppusõ ja eesti keele tunnõ. Rahmani Jani pilt
