Seod nimme kand Eestin 288 inemist. 16 kandjat om ka nimel Sermus, miä oll’ inne õ-tähe pruukmistõ võtmist üts võimalus, kuis sõnna sõrmus kirotõdi.
Mõisit, kon seo selge tähendüsega nimi panti, oll’ kokku 19, noist Liivimaa kubõrmangun 15 ja Eestimaa kubõrmangun 4. Lisas es jõvva üten mõisan, Vahtsõliinan, nimi ei hingelugõmistõ ega personaalraamatudõ, a Räpinä mõisarahva hulka om XIX aastasaa kesken tulnu Vahtsõliina Väikutaudsa Mihkli poig Jakob Sörmus, vällätiinnü soldat. Sõrmus võisõ olla timä niinimetet soldatinimi.
Mulgimaal panti seod nimme kuvvõn paigan: Taageperä, Penuja, Karksi, Polli, Tuhalaane ja Morna mõisan. Taageperä nimme kirutõdi hingelugõmisõn Sermus ja registrin Sormus. Ka keriklik kiräpilt Sermus om päämiselt säält lakja levinü.
Viil panti seo nimi Põh’a-Pärnumaa Kõima ja Parasmaa mõisan. Tartumaa kotussõ olli Alatskivi (hingelugõmisõn Sermus), Valguta Rannu kihlkunnan ja Jaamamõisa Tartu lähkün. Saaremaal oll’ kats kotust: Sääre mõisa Sõrvõn ja Piila mõisa Kaarman.
Põh’a-Eestin panti Sörmus Aadma mõisan ja Suuremõisan Hiiumaal ni Murasten Keilan ja Ohekatku mõisan Rapla kihlkunnan.
Võrumaa üts kotus om Sõristõ mõisa Kanepin. Sääl saiva seo nime joba 1809 Sarapuu Jaani kats poiga Taavet (Dawid) ja Hindrik. Nimi läts’ säält lakja Erästviirde ja ka Põlva poolõ.
Tõnõ suguvõsa tulõ Saru mõisast Harglõst, kon Linnarti Jaani kolm poiga katõst abielust ja pojatütre vei seo nime lakja ka Rõugõ kihlkunna poolõ (Tsooru, Nursi, Vana-Laitsna). Hingelugõmisõn 1826 om näide priinimi kirutõt viaga Söimus, a 1834 arvusaadavambalt: Sermus.
Sõnast ’sõrmus’ saad nimi om küländ levinü ka Vinnemaal, kon Kol’tsov (Кольцов) kuulus peris harilikõ nimmi hulka. Läti sama tähendüsega nimi Gredzens olõ-i nii harilik, a om iks olõman ja ka Eesti poolõ pääle levinü.
1921. aastal Petserimaal võeti perekunnanimme Sõrmus viiel kõrral: Lobotka, Petseri ja Pankjavitsa vallan.
Eestistämisel võti vahtsõ nime Sõrmus Koltov ja Koltsov Petserimaal ni Timbermann Karksin. Sama tekk’ Gredson Pärnun, timä vana nimi tulõtas veidükese miilde läti sõnna. Üts Sõrmus ka vahet nimme, võttõn asõmalõ Saaring.
Saarõ Evar
Rubriigin kõnõldas perekunnanimmi periolõmisõst ja tähendüsest.
