«Korõmbalt kavvõmbalõ» om vahtsõnõ kogomik, kon omma är trükitü koolilatsi kirätöie võistlusõ «Mino Võromaa» perämädse viie aasta parõmba tüü. 192-lehekülelidse kõvvu kaasiga raamadu jaos tsehkendi pildi Võro kunstikooli opilasõ.
«Mino Võromaa» om egäaastanõ latsi ja nuuri võrokiilside kirätöie võistlus. «Arvada om seo Eesti kõgõ pikäaolidsõmb latsi loomingu võistlus – ei olõ teedä tõist samalaadsõt, miä olõs aoproovilõ vasta pidänü 35 aastat. Võistlusõ hõigas’ edimält vällä Võro rajooni hariduskuundis, midä tuudaigu juhtsõ Leoski Arvi. Ildampa võtsõ võistlusõ kõrraldamisõ hindä pääle Võro instituut,» kõnõlõs võistluisi kõrraldaja ja kogomigu kokkosäädjä Kabuna Kaile.
«Mino Võromaa» võistlusõlõ omma olnu oodõdu nii vällä mõtõldu ku ka peris elost kõnõlõva jutu, nii luulõtusõ ku ka näütemängu. Algusõst pääle om kirätöid ka trükün vällä antu: edimält vallaliidsi lehti pääl mapin, a ku tehnilidse võimalusõ parõmbas lätsi, sis joba köüdetünä. Mustvalgõst kogomikust sai pääle 20. võistlust värvipiltega raamat.
«Pääle 30. võistlust ei olõ egä aasta inämb raamatut vällä antu, selle et nuuri, kiä omma valmis võro keelen kirotamisõ ette võtma, om veidembäs jäänu. Siski jõudva parõmba kirätüü kaasi vaihõlõ ja no tull’ trüküst «Mino Võromaa» kogomik, kon omma seen viie viimädse aasta, tuu tähendäs 31.–35. võistlusõ parõmba tüü,» seletäs Kabuna Kaile.
Raamatulõ värvi andma kutsuti Võro kunstikooli opilasõ. Nä saiva viie aasta töid lukõ ja säält vällä valli tuu, miä mõttõ ja käe kõgõ inämb liikma pand’. Nuurilõ kunstnikõlõ olli abis näide oppaja Kristersoni Triin ja Milli Urve.
«Mino Võromaa» võistlusõ parõmba kirätüü vali vällä hindajidõ kogo. Kõik 35 aastakka om hindamiskogon üten löönü Kreutzwaldi muusõumi pernaanõ Hollo Aimi. «Seo om Võromaa ja Eesti aokangas, midä naa latsõ kudava,» võtt Hollo Aimi aastidõpikkudsõ võistlusõ tähendüse kokko.
Kabuna Kaile lupa, et pia hõigatas vällä ka «Mino Võromaa» 36. võistlus.
Rahmani Jan
Kogomigu ettenäütämine 11. märdikuul Võrol, edeplaanil kokkosäädjä Kabuna Kaile. Rahmani Jani pilt
