Tal’na võro seldsi rahvas om teküs ja käü kuun mitmõn tsõõrin.

Näpotüühuviliidsil om tsõõr Nopõ-Näpo, laulumakja leelotasõ ansamblin Liiso, tiatrihuvilidsõ tunglõsõ näütemängutsõõrin Tungõl. Kirändüsehuvilidsõ liikmõ võtva ossa Kadrioro raamadukogon kuun käüväst võro keele kohvitarõst ja omma tuu kimmäs raudvara. Mi tsõõrõ kotsilõ saa lähembält lukõ värmilidsest raamatust «Tallinna Võru Selts 30», kon om ka pall’o pilte.

Kirändüshuviliidsi võro keele kohvitarrõ vidä Orioni Jana, kiä üten Kõivupuu Marjuga astõ mi rahva iin üles ka 7. märdikuu pääväl. Külälidse kõnõli pall’o huvitavat võro keelest-meelest ja raamatist.

Terve tuu nätäl, 7.–13. märdikuu, oll’ meil umakeelitsit tegemiisi täüs. Mi, pääliina võrokõsõ, ollimi põlisvõrokõisilõ iinkujos tuuga, et alostimi uma keele nädälit joba 5. märdikuu pääväl, ku kutsõmi Jüvä Sulõvi (Tartu Ülikooli võro keele oppaja) hindäle umakeelist tävvendüskoolitust tegemä.

Pühäpäävätsen (6.11) «Aktuaalsõn kaamõran» hõigas’ Pedassaarõ Ele keelenädäli uudissõ tervele Eesti rahvalõ maaha. Iispäävä olli võrokõsõ jälki uudissõsaatõn. Tal’na võro seldsi juhatusõ liigõ ja võro keele iistkõnõlõja Plumanni Kaja-Riina ütel’ väega kimmä sõnaga, et timä umma imäkiilt ei jätä! Kinä oll’ kullõlda-kaia tuud, kuis eestläsest ilmatütrik Tuula Siret võrokeelidse lausõ ütel’.

Mi võro keele nädälile pand’ 13. märdikuul punkti vai kirsi krõngli pääle lauluansambli Liiso sünnüpääväkontsõrt. Liisokõsõ noorõkõsõ, pruudiiän neiokõsõ, naarumakja naasõkõsõ saiva 25+1 aastakka vanas. Tuust 20 aastat om Liisot vidänü Nopri Tea.

Tuu +1 aastak om Liiso jaos olnu väega esieräline. 25 aastakka olõmi Liisot tiidnü laulvana, a 26. aastagal tekk’ tä suurõ edenemise ja nakas’ tandsma kah.

Austria tandsuakadeemiä oppaja Jõgi Deelia käe all saiva selges hanitandsu sammu ja üten lauluga tull’gi Kauksi Ülle «Kolmõ hinnapakmisõ» näütemängust muusikal, mis egäl puul väega lämmält vasta om võetu.

Sünnüpääväkontsõrdil astõ Liiso üles kolmõn jaon. Edimält olli rahvalaulu, tõõsõs tulli mi kavvaaigsõ liikmõ Proosi Mahta-Miljaana ja Kirberi Koidu laulu ja kolmas osa oll’ lustilaulõ perält.

Vaihõpääl, ku Liiso umma esinemisvormi tävvend’, tandsõva mi sõbra Raabiku tandsuansamblist.

Seldsi juhatusõ otsusõga saiva liisokõsõ hää hanidõs ümbre muutumisõ iist pääle krõngli viil personaalsõ nokatävve hüvvä põrknakuuki.

Müürsepä Külli

Lauluansambli Liiso umal sünnüpääväkontsõrdil. Leiese Eno pilt