Perämäidsil aastil tulõ iks jõulu aigu jutus, et salme ei viisitä pähä oppi, loetas telefonist maha. Teema om küländ lagja ja lätt jõuluvanast kavvõdalõ. Tulõmust näemi ka egan pidulauan, kon kiäki üritäs laulu üles võtta. Edimädse kats rita om maksimum, kon kiäki viil sõnnu tiid. Ma muiduki vabanda noidõ vanainemiste iin, kiä mullõ ütel sünnipääväl laulusõnnu ette ütlivä. Kahjus ei olõ säändsiid sünnipäivi inämb trehvänü.
Ku miilde tulõta, sis keskkoolin oll’ luulõtusõ lugõmine naaruväärt ja häbüasi. Nikagu… üts poiss oll’ lugõnu Arvi Siiga. Tuu kirut’ noist asjust, mia meile tähtsä. Makki sai hindä nii kavvõndalõ, et lugõsi pääst, kuis autor Kopli Hertsogi pigimusta eidega tandse ja perän tappa sai, aga Hertsog pidi kah umma verist nõnna peldikun praavitama. Säält pugõsi määnegi au mõistõ naha vahelõ ja sinnä tä (osalt) jäigi.
Ah et luulõtuisi ei kullõlda? A kuis olõsi sis: «Ja nii nad tapsidki Ferdinandi. – Millise Ferdinandi, proua Müllerova? Ma tunnen kaht Ferdinandi, üks, kes teenis rohukaupmees Pruša juures…» Ja nii edesi, nikagu Müllerova ütles: «Oh ei, selle paksu ja jumalakartliku.»
Nika sinnäni ei lähä vast igäväs. Saali kaien saat aru, kui pall’u täüskasunuid tekstile üten pomisõs. Ku pomisõs, ei olõ asi viil pästmäldä kaonu.
Noh, ja sis sekkä viil mõni Runnõli noorõpõlvõ krantsus, midä mu 50aastanõ (!!!) poig siiämaani pääst mäletäs.
Ja viil: määnegi umakoet ansambli võinu laulda üte salmi koorilaulust, mia algas: «Nii nad tapsid Ferdinandi.» Mäletädi jo küll, Ferdinant sai kriitikat tollõ iist, et tä nii armas oll’.
Ma pea nüüd umapuulsiide näütidega lõpu tegemä, muidu ei jää tõistõl midägi mõtõlda-esitädä. Kui seo teema lõplikult ja tõtõ meelega kirjä panda, piasi päälkiri olõma «Eestläse hindäparandamise tii läbi jõulõ».
Huvitav, pall’u om noid latsi, kiä täämbädsel pääväl viil jõuluvana sisse uskva? Ma sai küll joba viieaastadsõlt aru, et tuu om üts täüskasunuidõ tsirkus. Tsirkus küll, aga olgu sis vähämbält hää ja huvitav.
Kuigi tähtpäävä omma vägüsi paika pantu ja 2023 aastat tagasi es sünnü määnestki Kristust, tasus tsirkust edesi pitä. Kristus tuuläbi ei kannata ja rõõm om kõgõ teretulnu.
Ja naar om paratsetamooli kõrval üts vägevämpi tervendäjiid.
Pulga Jaan
