Katõtõistkümnele tähemärgile kuulutas laelambi abiga vahtsõs aastas tüü-, raha-, armastusõ- ja ilmaõnnõ Eesti kõgõ veidemb tunnõt tähetark Kaldmani Hedi (48).
 

Oinas 21.03.–20.04.

 
Tüü. Tüü om sul hää, a majanduskriis tulõ – hoia umast ammõtist kinni, esiki ku väiku as’a sinno sekässe.
Raha. Süstemin tulõ viga ja su palk nõsõs, kuigi boss tuud es lupa. Olõ vakka, sõs ei panõ kiäki tuud tähele.
Armastus. Olõt naisimiis vai miihilumja, esiki ku sa tuud ei taha. A õkva sa piät tuu iist hää saisma, et kiäki haigõt es saanu.
Ilm. Sõs, ku sul puhkus tulõ, om lämmi. Muul aol om 0–10 kraati, hall.
 

Pull 21.04.–20.05.

 
Tüü. Pullilõ passisõ kihälidsembä tüü. Tii karjäärikäänähüs – põllumajandusõn om tüükässi vaia.
Raha. Ku joba põllu pääle sait, panõ sinnä rahapuu kasuma. Edimäne saak võiolla olõ-i nii hää, a tuu om investeering pikembä ao pääle.
Armastus. Pulli piät saama.
Ilm. Sitt.
 

Katsiku 21.05.–21.06.

 
Tüü. Veenüse kolmnukk näütäs sullõ kolmõ tsihti: jää uma tüükotussõ pääle, lövvä vahtsõnõ vai panõ uma firma pistü. Töötukassa ammõtnik ütles sullõ, määne näist om õigõ.
Raha. Katsikul kulus rahha kats kõrda inämb – inflatsioon.
Armastus. Mine «Vallalidsõ kaunitari» saatõhe, olõ sa miis vai naanõ. Brigitte uut sinno!
Ilm. Lumõtorm, a suvõl, vast hainakuun. Su jaos tuu olõ õi ime.
 

Vähk 22.06.–22.07.

 
Tüü. Mine är – su parhillanõ tüükotus om halv. Vahtsõ lövvät kivi alt.
Raha. Võidat lotoga, a õnnõ sõs, ku ostat piledi bussijaamast. Määndsest, tuud ma ei ütle. Piät Eestit pite ümbre kolistama!
Armastus. Ja ku sa sääl nigu Nipernaadi kolistat, sõs tulõ sullõ siist ja säält mõni vahtsõnõ silmärõõm vasta. A peräkõrd vii tõõnõpuul su õks kodo är.
Ilm. Nigu Ibizal. Alostusõn om tuu maru mõnnus, a poolõ aastaga päält nakkas ikäv. Pallõ puujumala käest vihma ja tormi.
 

Lõvi 23.07.–22.08.

 
Tüü. Nakkat hinnäst tüü man ülearvo pall’o kõrdama, nii ei sünnü inämb rahha vasta võtta. Mine kõnni mõtsan ja saa inspiratsiooni!
Raha. Julgõ Lõvi rahakott om täüs. Küsü õnnõ ja sullõ antas! A hoia alt – koti seen om mulk.
Armastus. Võis jo alalõ jäiä. Vai tulla, ku viil olõ-i.
Ilm. Likõ nigu sa esi.
 

Neitsü 23.08.–22.09.

 
Tüü. Neitsüs jäiä sa ei saa – tulõ naada maailma kõgõ vanõmbat tüüd tegemä. Tõistmuudu ei saa, eelektri om kallis!
Raha. Nakkas tulõma.
Armastus. A vahtsõ tüü mant lövvät armastusõ ja muud kah. Õnnõs saa seo ilma aigu kõkkõ tohtõrda.
Ilm. Satas lillat vihma – mille külh?
 

Kaalu 23.09.–23.10.

 
Tüü. Kaalukotta tüüle – viuh!
Raha. Rahakott võtt kaalun mano – olõ õnnõlik, kooni tuud viil jakkus. Ku sul om kodolain, sõs ei jakku – euribor võtt kõik käest.
Armastus. Läät 65+ jõulupitto ja saat säält süüfilise. Ja naabrimutt saa kah.
Ilm. Lumõtorm Birgit 2.0 vii su katussõ sõitma. Jama lugu.
 

Skorpion 24.10.–22.11.

 
Tüü. Jupiteri ja timä kuu Europa nukk näütäs, et nakkat nõudma üleriigilist kuvvõtunnist tüüpäivä. Kõigil om tuu üle hää miil.
Raha. Õnnõ rahha om tuuperäst veidemb.
Armastus. Saat arvo, et su parhillanõ suhe om kihvtine – otsi vahtsõnõ! Vällä arvatu sõs, ku parhillanõ käü inämb-vähämb – las tä sõs jääs.
Ilm. Kuldmunnõ satas nigu uavarrõst.
 

Vibumiis 23.11.–21.12.

 
Tüü. Saat Euruupa Kontrollikotta tüüle, a kiäki ei tiiä, mille.
Raha. Panõ hopõn eelektrit ajama – muido läävä arvõ viil suurõmbas, ku nä mineväaasta olli.
Armastus. Vibumiis muutus Amoris ja jaga armastust õnnõ tõisilõ, hindäle jää-i midägi.
Ilm. Vesipüks tege su püksi likõs – hoia kõik aig kuiv paar ligi.
 

Kivikits 22.12.–20.01.

 
Tüü. Saat umbõlõ kuulsas. Ja tunda kuulsusõ vaiva.
Raha. Tsilgus siist ja säält. Pulmõ jaos olõ-i viil küländ.
Armastus. Seol aastagal eksperimenteerit pall’o ja saat hindä kotsilõ midägi vahtsõt teedä.
Ilm. Sul omma roosa prilli iin: kõik aig satas ijävihmä, a sa näet õnnõ pääväpaistõt.
 

Viikaldaja 21.01.–19.02.

 
Tüü. Kaet Youtube’i ja käüt kalal – tüü jaos aigu ei jää.
Raha. A mis pensionäril iks tuu rahaga tetä om? Söögi jaos vast jakkus.
Armastus. Haniperselill (kar’akakar) tiid, miä tulõ, laelamp tuud ei näütä.
Ilm. Taivast satas lihapallõ! A sa naksit õkvalt veganis…
 

Kala 20.02.–20.03.

 
Tüü. Sul saa kõgõst taast elost viländ ja läät Aafrikahe priitahtligus. Tulõt säält tagasi ja sis olõt õnnõlik.
Raha. Raha libises käest, selle et tiit mahlakuun ulli otsussõ. Terve aasta piät tuud peräst klaarma.
Armastus. Titat sa es saa ja pulmõ kah es piä – jäät no igävädses aos anonüümses.
Ilm. Läät jämmes, selle et ilm om kõik aig nii halv, et sa ei taha nõnna ussõst vällä tsusada. Võiolla trenaþöör avitas, a kõik mi jo tiiämi, et tuud kiäki periselt ei pruugi.

Reimanni Hildegardi tsehkendüse