Taa lugu sündü sõs, ku mu vanaesä ja timä sõsar olliva väiku. Nä ellivä Leevi lähküh Kunksilla küläh ja näide latsõs olõmisõ aigu es olõ pall’o mängoasjo. Hää, ku mõni ütsikki oll’. Näütüses tütrigul pupp ja poiskõsõl plekist massin. Mu vanaesä perreh olliva viil näide esä tettü puust eläjä ja paiupilli. A tuuperäst, et es olõ mängoasjo, es jää ütski mäng mängmäldä! Mõtõldi egäsugutsit tempõ ja toimõnduisi vällä.
Latsõ iks tegevä tuud, midä nägevä, ja perre egäpäiv oll’ latsi mängeh seeh. Olku sõs kana munõminõ vai lehmä nüsmine. Vanaesä latsõpõlvõh tull’ pall’o ette, et vana sugulasõ kuuli är, ja latsõ võeti iks puhtilõ üteh. Matussõ olliva umbõlõ põnõva! Fantaasia läts’ tüüle ja tekse himo vahtsõ mängo perrä. Sõsar ja veli otsustigi mängi vahtsõt mängo – puhtit.
Tarõh oll’ pikk pink, kohe pääle panti kattõs valgõ lina. Veli visas’ lautsilõ pikäle ja varrampa aia veerest kor’atu põllulilli tsusati «koolnulõ» peio. Sõsar opas’ velele, kuis kässi rõnna pääl risti hoita, et iks illos ja jumalalõ meele perrä olõs. Kapisuhvlist otsiti vällä viil tõnõgi sängülina, et tuu sündsähe koolnu pääle laota. Pini ja kasski tulliva uudishimost kaema, mis andsak kombõtalitus valla om lännü.
Kuna latsõ üttegi matussõlaulu es tiiä, jorotõdi ütte latsilaulu pikält, vinüvält ja umbõlõ hallõlt. Pinigi naas’ üten ulgma. Kuna «leinäliidsi» oll’ üts, tull’ «koolnul» laulmisõ man kõvva perrä avita, et matus matusõ mõõdu vällä annasi.
Keset suurt kombõtalitust tulliva uutmalda kodo latsi vanõmba. Tulli tarrõ ja näivä kõrraga, et latsõ mängvä puhtit. A tuu asõmõl, et leinäjit trüüsti, mängu üteh tulla ja perrä kittä, saiva nä ilmadu kur’as. Latsõ saiva vanõmpidõ käest kõvva tapõlda ja tõrõlõda: «Säändsit mänge ei mängitä! Seo sündmüs om kistumalda kurb ja hallõ! Kiä kül nii ull’ om, et säändse sündmüse pääle nall’a tege?!»
Lugu lõppi tuuga, et sõsar ja veli lasksõva nüüd hulga peris õigõt silmävett. Kuigi surm ja matus omma elo üts tähtsä osa, es mängi vanaesä uman latsõpõlvõn inämp kunagi puhtit. Mängse õnnõ pulmõ.
Plaado Maritte Arianne
Reimanni Hildegardi tsehkendüs
