Päält koroonaga köüdetüt vaheaigu nakkas vahtsõst pääle Võro valla mälumänguturniir. Mängjä hindasõ seod ettevõtmist selle, et Loka Toomas mõist mängu jaos väega põnõvit küsümüisi kokko säädi. Edimäne mäng tulõ 16. radokuul kell 18 Võro vallamaja saalin.

Edimält om plaanin kõrralda kolm mängu, a või-olla tetäs noid ka rohkõmb. «Varramba oll’ kah kolm plaanitu, a lõpus es saia pidämä, sai neli. Üts aasta oll’ viis kah,» seletäs küsümüisi kokkosäädjä Loka Toomas.

Võro valla mälumänguturniiri peeti varrampa hää mitu aastakka, a 2020. aastaga keväjä jäi tuu äkki koroona peräst katski. «12. urbõkuul 2020 pidi olõma mäng Navi rahvamajan, a tuu jäeti är, selle et inne oll’ peetü sääl sünnüpäivä ja säält koroona lakjaminek Võromaal pääle naas’ki. Järgmäne päiv läts’ terve Eesti kinni,» tulõtas Loka Toomas miilde.

No omma inemise koroonaga är harinu ja aig om mälumängmisega edesi minnä. «Mitmõ omma iks küsünü, kuna taa mäng jäl pääle nakkas. Järeligult tahtva inemise mängi,» kõnõlõs Võro valla kultuurinõvvuandja Rosenbergi Maarika, kiä mängu kõrraldamist vidä.

«Egän mängun om 40 sainast saina küsümüst: omma esi teema, om pilti, hellü ja tekstiga küsümüisi kah. Kiä om mu kokko säetün mängun käünü, nuu võiva aimada, mis säält tulõ,» paotas Loka Toomas tsipakõsõ ummi plaanõ.

Mälumängmine om moodun mitmõl puul ja Loka Toomas kitt ka tõisi kõrraldajit. «Rõugõn tege Tupõ Ain-Ivar hääd mälumängu. Tuu om ummamuudu mäng, kon küsümüisi mano käü mõistaandminõ kah. Ja aastit om Rätte Jana Õllõ 17 pubin häid mälumänge tennü,» and tä teedä, kon esi mängmän käü, ja pruuv ka vallalõ seletä, mille mälumängmine inemiisile meele perrä om: «Nii hää om mitu tunni tarku inemiisi seen olla ja peräkõrd jääs hindäle kah midägi külge.»

Huvilidsõ, kiä Võro valla mälumängulõ tahtva tulla, võinu hindäst kooni 13. radokuuni Rosenbergi Marikalõ teedä anda. Mängulõ oodõtas nelä mängjäga võistkundõ.

Rahmani Jan

Küsümüisi vällämärkjä Loka Toomas om esi kah tunnõt mälumängjä. Rahmani Jani pilt