Sõbrapäävä õdak saadõti Varstu kultuurikeskusõn müüdä mõnusan õhkkunnan. Tunti mõnnu esimuudu värminguga muusigu, laululuuja, kirämehe ja võru liikmise iistvidäjä Pulga Jaani juttõst ja laulõst nii tä hindä ku sõpru suu läbi. Õdak oll’ pühendet paari kuu iist olnulõ Jaani 75. sünnipääväle.
Kokku oll’ kultuurikeskustõ tulnu päält saa inemise. Õdak oll’ otsast lõpuni võrukiilne, tuud juhtsõ Kaha Kaido Põlvast, kiä nimet’ päävä Jaani aus Jaani pääväs.
Alustusõs laulsõ Mõtsavenna bänd sünnüpäävälaulu, pääle tuud Jaani tettüid laulõ. Bändin mäng ja laul üten ka Jaan esi.
Jaani lugudõl om kõgõ ümbre nall’anuut, miä pand näide kullõmisõst häädmiilt tundma. Mõttusõ Meelis tennäs’ võrukeelitside laulõ iist ja kinkse Jaanilõ kerä juustu.
Saarõ Evar Võru instituudist kõnõl’ Jaani sugupuust ja tä priinime luust. Rahmani Jan tulõt’ miilde pikki autusõitõ müüdä Eestimaad «Viie pääle» kambaga ja kand’ ette ummi võrukiilsid laulõ.
Contra tulõt’ miilde mitmõsugumaidsi kuuntegemiisi Jaaniga, laulsõ paar umma laulu ja üte Jaani laulu uman mahlan. Kama Kaido mõlgutusõ olli köüdedü võru liikmise alostamisõ ja tõisi ütentegemiisiga.
Duo 2882 – Lindmetsa Harri ja Hinrikusõ Henrik – mängse lõõdsalugusid. Visseli Malle laulsõ Jaani sõnnu perrä luu «Unistus». Ansambli Kõhukesed laulsõ niisamatõ Jaani laulõ ja tulõt’ miilde muhedit kokkusaamiisi, Jaani puul käümiisi ja toda, kuis kogõmalda sai osalt Sangastõ polka viie pääle kirutõt Jaani laul nimes «Pulga Jaani Sangaste polka», a ütskõrd ütli mehe kogõmada ka «Pulgaste polka».
Sprengi Ale kõnõl’ ütitsist põnõvist latsõpõlvõaastist Varstun ja Laube Kadri laul’ kah viil üte sünnüpäävälaulu. Lõpõtusõs lauli kõik pillimehe kuun Jaani kuulsambit hitte «Egämehe reilendri» («Tulõ aga tulõ», midä peetäs joba rahvalaulus) ja «Ei olõ hullu». Häid suuvõ ja kingitüisi jakku viil maja, Võru instituudi ja tutvidõ inemiisi puult.
Jaan tennäs’ paiga pääle tulnuid, suuvsõ kõigilõ rõõmsat miilt ja esimõtlõmist ja ütel’, et tä ei mõista külh kedägi opada. A egä Jaani ütelüs ja jutt oll’ egä kotusõ päält köüdet suurõ elukogõmusõ ja luudusõst huulmisõga, egäst lausõst võisõ leüdä süvä mõttõ ja kimmä elutarkusõ.
Visseli Malle
Mõtsavenna bänd Varstu kultuurikeskusõ püüne pääl. Bändin mäng ja laul üten ka Pulga Jaan. Toomõ Triinu pilt.
