8. urbõkuul alost’ Võrol sagõhusõ 88,0 pääl raadiojaam Retro FM Võru, miä mäng egäl tüüpääväl kolmõminotilist võrokeelist uudissõsaadõt. Sõnomit sääd kokko ja lugõ Uguri Kadri. Saatit kuuld raadiost Vana-Võromaa keskjaon, säälhulgan Võro ja Põlva liinan, kell 9, kõrdust kell 13 ja 17 ja noid saa ka internetist perrä kullõlda.
Uudissidõ kokkosäädjä Uguri Kadri seletäs, et tä es mõtlõ kavva, ku sai teedüsse, et otsitas inemist, kiä võinu raadion võrokeelist saadõt tetä. Tä and’ hindäst raadiojaamalõ teedä ja naas’ki pääle. Raadiojaam Uguri Kadrilõ väega pall’o ette es ütle, määndse nuu uudissõ olõma pidänü. Taheti, et saadõ olnu kolm minotit pikk, sõnomi võinu olla tsipa nal’alidsõ. Poliitikajuttu väega es taheta.
«Ma püvvä löüdä säändsit juhtumiisi vai protsesse, mis mu meelest omma tähtsä. Võromaa arõnduskeskusõ tüün mõtlõ latsi ja nuuri vaimsõ tervüse ja hääolo pääle, sis ma olõ otsnu säändsit asju kah, mis om tervüse vallast vahtsõmbat. Mul om põnnõv pruuvi hindäl kah, kas ma mõista egäst as’ast võro keeli kõnõlda. Tuuperäst kõnõli üten saatõn kunstmudsust, köüdüssen Taagepera Reinu juubõliintervjuuga,» seletäs Uguri Kadri.
Teema umalõ saatõlõ löüd kokkosäädjä aolehist ja sotsiaalmeediäst. Tä pruuv innekõkkõ Lõunõ-Eesti ello pututavist asjost kõnõlda lihtside sõnnuga, jutustava laadiga.
Kuigi saatõ omma käünü viil küländ lühküt aigu, om Kadri saanu umilõ saatilõ hääd vastakajja. «Edimädsel pääväl oll’ Jüvä Sullõv nännü mu postitust ja õkva kõlist’, et mis tuu sis nüüd om ja kuis tuu nii äkki tull’. Ma hiitü är, et mis ma võlssi tei, kelle varbidõ pääl sõki, a sai hoobis kittä,» seletäs Kadri.
Tuu, et kommertsraadiojaam, miä edimält kül proovis ja poolõs aastas Võromaalõ tull’, õkva võrokeelitsit uudissit tegemä naas’, näütäs Uguri Kadri meelest, et võro kiilt peetäs tähtsäs. «Egä kanal taht kuigi silmä paistu. Nä tahtva saia kotusõpäälist reklaami, a sis nä piät tegemä säänest programmi kah, miä paiklikõlõ inemiisile miildüs, et tuud kullõldu. Ja ku võro kiil om argument reklaami müümise man, sis tuu om kõva sõna,» löüd saatõ kokkosäädjä.
Raadioeetrin saa saatit kullõlda kül õnnõ Vana-Võromaa keskjaon, a muialpuul om noid võimalik egäl aol kullõlda ka internetist aadrõsi sky.ee/retrofm/retrofm-vorukeelsed-uudised päält.
Rahmani Jan
Raadiojaama Retro FM Võru võrokeelitside uudissidõ kokkosäädjä Uguri Kadri. Rahmani Jani pilt
