Naa kats nimme tähendä ei sukugi ütte ja tuudsamma, nii nigu kats näütlejät Indrek ja Rain omma iks tõnõ tõist muudu, kuigi näide nimmi tõnõkõrd segi aedas.
Nimel Sammul om Eestin 98 kandjat. Hingelugõmisõ algkujul Sammul panti taa kolmõn mõisan: Vana-Kariste, Heimtali ja Sürgavere. Lisas nailõ Mulgi- ja Viljandimaa mõisilõ viil Karula (Vahtsõ-Võidu) mõisan, kon hingelugõmisõ 1826 ja 1834 olõ-i alalõ. Viiratsi mõisan hingelugõmisõ kujul Samul pantust nimest sai keriguraamatin kah Sammul. Ainukõnõ Võrumaa kotus, kon Sammul tegüsi, oll’ Taheva mõisa Harglõn (hingelugõmisõn kah Samul). Viil panti Samul Kavastun, Torma Kõnnu mõisan, Vahtsõ-Kasaritsan, Vahtsõ- ja Vana-Antslan, Rogosin, a mõnõl puul noist kotussist sai tuust hoobis täämbäne Samuel.
Sammulit om võet ka eestistämisel, nimmi Saum ja Schul(t)z asõmalõ.
Nime alussõs omgi inemisenimi Samuel, heebreä nimi, minkal mitu tähendüse tõlgõndust: ’jumalast kuulda võet’, ’timä nimi om jummal’ jt. Jidišin üteldäs Schmul, tuu om meile kah tutva nimi.
Võru keelen om seo edenime üts vana kuju Sammul’ : Samuli. Pia üttemuudu om nimekuju põh’asaami keelen: Sámmol. Wiedemanni sõnaraamat näütäs, et ka Kihnun om üteld Sammul, a Võru- ja Tartumaal om iks kõgõ hariligumb olnu Saamo.
Nimel Simmul om Eestin 76 kandjat. Õisu mõisan Mulgimaal sai seo priinime katõ pojaga tütrik Ell, kiä esi oll’ Siimu tütär (Simos Tochter). Simo oll’ ka tä vanaesä nimi. Haani mõisan panti Simmul Simula külän. Külä nime alussõs om sääl Roodsi aigu (1683) elänü Simona Kersten. Mustja mõisan, õigõmbidõ Osula külän, panti Simmul Simula talu perrä. Viil om pant priinimi Simul (ütessä kandjat), miä paistus ollõv õnnõ Karula Kaagjärve mõisa nimi.
Tan om no juhtunu sääne asi, et tõnõ piiblinimi Siimeon, heebreä keelen tähendüsega ’(palvõ) kuuldavõtminõ’, om edimält andnu võru keelen nimekuju Simmun : Simuna, nigu näütüses simunapäiv (28.10). Vinne kiilde om tä andnu muiduki nimekuju Semjon, minkast peri talunimi Semmeni om Lõuna-Eestin kah peris harilik. A tuud nimekujju om minkagiperäst edesi arõndõt, nii et om saad n-lõpu asõmalõ l-lõpp Simmun > Simmul. Tüvevokaal om alalõ püsünü, umasütlejä käänüs iks Simula.
Saarõ Evar
Rubriigin kõnõldas perekunnanimmi periolõmisõst ja tähendüsest.
