20. lehekuul peetäs Kubija laululava pääl Võro maakunna laulu- ja tandsupito päälkiräga «Võta aigu!».

«Lavastaja Kõrrõ Tea mõtõ oll’, et mi kõik aig ruttami egäle poolõ, om kipõ, a pido võinu miilde tulõta, et vahepääl tulõ ka aigu võtta,» seletäs pido kõrraldaja Valsi Kristi Võromaa arõnduskeskusõst. Mõttõlõ saadi vunki mano ka Vunderi Eva-Lotta ja Kalkuna Mari laulu «Mul aigu om» sõnomist.

Pido muusigajuht om Rõõmusõ Signe. Eräle tulõ pidol seto kultuuriplokk, midä lavastas Torm-Kriisi Piret, ja folklooriplokk, midä lavastasõ Mähari Kadri ja Leelanssi Inga.

«Seo aasta tulõ väega uhkõ pido, selle et meil om esinejit üle 2000. Omma Võro maakunna koori, tandsurühmä, orkestri, rahvamuusigu. Meil omma ka küläliskollektiivi Põlva maakunnast, selle et sääl maakundlikku pito timahava ei tetä. Viil om kolm kollektiivi Tartomaalt ja üts Harjumaalt,» kõnõlõs Valsi Kristi.

Pido ettevalmistamisõga om hulga tüüd olnu, a Valsi Kristi om rõõmsa, et om hulga häid abiliidsi. «Võro liinavalitsusõ rahvas tekk’ Kubija laululava man talgu, nii es piä mi eräle talgit kõrraldama. Kubija laululava edine om puhas, minevä aasta valõti vahtsõnõ tandsuplats. Loodami, et kõik esinejä tulõva kohalõ ja päältkaeja näile üten elämä,» ütles tä.

Nätäl ildampa, 28. lehekuul peetäs Kubijal ka Lõuna-Eesti memme-taadi rahvapito «Metsast merele». Tuul pääväl om Kubija laululava pääle uuta 83 vanõmbidõ inemiisi laulu-, muusiga- ja tandsukollõktiivi. Kokko ast memme-taadi pidol üles 880 esinejät Võro, Põlva, Valga ja Villändi maakunnast.

Rahmani Jan

Võro maakunna laulu- ja tandsupido kõrraldaja Valsi Kristi Võromaa arõnduskeskusõst. Rahmani Jani pilt