Valmis om saanu kuvvõnda Uma Pido noodivihk ja nakkas pääle kuurõ kirjapandminõ pidolõ, miä tulõ 1. piimäkuul 2024 Põlvan Indsikurmun.
«Seokõrd om pido teema «Mäng», miä pakk rõõmu kuun olõmisõst, kuun laulmisõst ja kuun hengämisest. Ütenkuun hõisatõn hoiõtas võrokõisi perändüst. Ja ku mi juurõ omma sügäväl, sis ei kanguda meid siist kunagi ütski torm ei maru,» kõnõlas Uma Pido pääkõrraldaja Tigasõ Merike.
Pido kavan om seokõrd vahtsit kuurõlõ säetüid laulõ, vanõmbit koorilaulõ, rahvalaulõ ja teemaga köüdüssen saa pidol nätä ka hulga laulumängõ. Pido lavastaja om Põlvast peri Leesalu Diana.
Pidolõ saa hinnäst kirja panda kooni 1. märdikuuni 2023. Laulma oodõtas mudilaisi-, latsi-, poiskõisi-, naisi-, miihi- ja segäkuurõ Lõuna-Eesti maakundõst. Niisama omma oodõdu koori muialt Eestist – tulõ õnnõ tahta võrokõisiga kuun võro keelest ja meelest rõõmu tunda ja laulu är oppi.
Nigu varramba, saava ka seokõrd ütiskuurõga kuun püüne pääle astu kunnakoori, kon saava kokko perekunna, sõpruskunna vai kogokunna. Om õnnõ kats nõudmist: kunnakuur piäs viisi pidämä ja täl piäs olõma juhendaja, kiä mõist nuuti lukõ.
Viil oodõtas nurmõnaisi ja mõtsamiihi kuurõ mano, kiä omma hinnäst Umalõ Pidolõ kirja pandnu. Ütenkuun opitas selges naisi- ja miihikuurõ laulu ja naisi-miihi osa ütiskuurõ laulõn. Täpsämb teedüs www.umapido.ee lingi päält uudissidõ alt alatõn 15. süküskuust.
Koori kirjapandmisõs tulõ täütä registriirmise vorm internetin. Vormi löüd kodolehe umapido.ee päält rubriigist «Teedüs esinejile».
Pido noodivihk om 80 lehekülge ja ütine kõigi kooriliike jaos. Latsilõ mass noodivihk 3 eurot ja suuri inemiisi kuurõlõ 5 eurot. Koorijuhi saava noodivihu massulda. Ku kuur ei mõista õkva otsust tetä, kas tulla Umalõ Pidolõ, sis või pallõlda noodivihu hindäle tutvas saamisõs saata.
Noodivihkõ om võimalik kätte saia:
– Võro Instituudin (Tigasõ Merike, tel 5691 6280);
– Põlvan (Uuslaili Taisto, tel 5749 3451);
– Tartu Omavalitsuisi Liidun (Halliku Astrid, tel 5649 1696);
– postiga (sis tulõ noodivihkõ hinnalõ mano saatõkulu).
Lähembät teedüst saa Uma Pido pääkõrraldaja Tigasõ Merikese käest, merike.tigas@wi.ee, tel 5691 6280. Uma Pido kodolehe aardõs om umapido.ee.
UL
Vahtsõn lauluvihun omma:
● ütiskuurõ laulu naisi-, miihi- ja segäkoorõlõ kuun laulmisõs;
● segäkuurõ laulu;
● naisikuurõ laulu;
● latsikuurõ laulu väikeisile ja suurilõ tütärlatsilõ ja poiskõisilõ kuun laulmisõs;
● ütiskuurõ laulu kõigilõ kuun laulmisõs;
● laulumängo kõigilõ kuun laulmisõs ja mängmises.
