Põlva kandi Lutsu tiatri tähistäs umma 10. huuaigu Ruitlasõ Olavi kirotõdu võrokeelidse suvõtüküga «Turg». Tükkü mängitäs ütsäl õdagul, 9. piimäkuust kooni 18. piimäkuuni Lutsu küläplatsi pääl. Lavastaja om Eensalu Ivo.
Tükü vällämärkjä ja kirjapandja Ruitlasõ Olavi seletäs, et «Turg» om elo kitsambas tett mutõl. «Mutõl kõlas nigu putõl! Elon käü kah kõik aig kauplõminõ – väärtüisi, tõtõspidämiisi ja muu säändse üle. Kõgõ om inemisel võimalus uma heng maaha müvvä, kas sõs sente vai parõmba raha iist.»
Lutsu tiatri iistvidäjä Rüütle Janno kitt takka, et kuigi tego om nal’atüküga, om teema väega tõsinõ. «Kõik mi elo om periselt turu pääl: meil om börs, meil omma turuhinna, kauba omma turu pääl, teenüsse omma turu pääl. Turu pääl om inemiisi läbikäümine kah. Turu pääl om kõkkõ võimalik müvvä, kõkkõ osta. Tan tükün omma inemise uma läbikäümisega kah turu pääle lännü ja kaias, kes ja määndse hinna iist om nõun millestki vallalõ ütlemä.»
Tiatritükü lavastas Eensalu Ivo ja seo om timä 101. lavastus. Kunstnik om Vahtre Silver, kostüümikunstnik Leiteni Hille. Külälisnäütlejäs om timahava Võromaa miis Troll’a Agu. Mängvä viil Saarõ Liili, Kooskora Kristo, Arulepä Kaido, Vaheri Kätlin, Nagelmaa Uno, Asberi Aveli, Kooskora Kristin, Paulsoni Manivald, Lihtsa Egle, Põvvatu Helje, Kottise Jan-Matias, Paulsoni Eduard.
Lutsu tiatril lätt joba 10. huuaig. «Olõmi egä suvi midägi tennü, üts koroona-aasta jäi vahelõ. Või üteldä, et taa om sääne projektitiatri: suvõl tulõva näütlejä kokko, teemi nätäl-paar etendüisi ja sis om jälleki puhkus,» seletäs Lutsu tiatri iistvidäjä Rüütle Janno.
Säändse projektitiatri jaos ei olõ kümme huuaigu peris väiku nummõr. Rüütle Janno jutu perrä tetäs egä suvi vahtsõnõ tükk tuuperäst, et paigapäälidse näütlejä tahtva mängi. «Ja paistus, et kaeja omma kah meid umas võtnu. Ku tiatritükkü parajahe ei mängitä, sis iks kõlistõdas ja küstäs, kuna mi jäl midägi teemi ja midä vahtsõt plaanin om.»
Tuuperäst või luuta, et seo 10. huuaig jää-i Lutsu tiatri jaos perämädses. «Mul omma paaris järgmädses aastas plaani olõman. Tahami taad asja kimmähe edesi aia,» seletäs Rüütle Janno.
Rahmani Jan
Lutsu tiari 10. huuao suvõtükü «Turg» pruuv Lutsu küläplatsi pääl. Rahmani Jani pilt
