Põlva küle all Mamastõ küläplatsi pääl tulõ seo puulpäävä, 3. piimäkuul, teküs päiv. Kell 13 alostas nostalgilinõ võrripäiv, kon joostas punnvõrrõ käümä ja tetäs esisugumaidsi võistluisi. A õdaku kell 18 läävä säälsaman püüne pääle pillimehe ja peetäs maaha lõõdsasimman.
Päävä kõrraldaja Kaha Kaido ütles, et oodõdu omma kõik võrrimehe. «Kutsumi kokko kõiki, kel vähägi om sääne võrr, miä kuun püsüs. Ja ku tä ei püsü kuun, sis või tuu panda käru pääle vai kuuti ja iks näütämä tulla.»
Midä võrripääväl tetä plaanitas? «Üts jago om näütüs. Meil om ütel Mamastõ mehel pia 30 esisugumast võrri. Ja oodõdu ei olõ mitte õnnõ võrri, a ka katõkäügilidse mopeedi, kõik, mis omma kooni 50 kuubikut. Tahas tetä võistluisi, võrrõ käümäjuuskmist. Latsilõ ja suurilõ. Plaan om võrriaigu miilde tulõta,» seletäs Kaha Kaido.
«Mul tehnikahuvi tull’gi võrrist. Sai naabripoisi käest tsõõrõga võrriraami, a mootorit es olõ pääl. Vidäsi terve päiv pudõlit Põlvahe taaralattu, mootor massõ 50 ruublit. Mõsksõ piimäpudõlit ja purkõ, imä takast vei ka kalliid purkõ taaralattu, et hindäle võrrimootor osta, ja sai tuu kätte,» kõnõlõs tä.
Tuu, et võrrimehel läts’ hulga aigu ja jõudu võrri käümäjuuskmisõ pääle, omgi põhjus, mille päävä kõrraldaja omma käümäjuuskmisõ-teema üles nõstnu.
Võrrõga tull’ umal aol poiskõisil tüllü kah ette. «Mi aigu oll’ Mamastõ külä pääl 18 võrri. Ku võrriparv kortõrmajjust müüdä linnas’, sis oll’ majan telekal pilt iist kaonu, selle et ega meil kündlekaidsõt pääl es olõ. Sis tulti aknõ pääle, vibutõdi ruskut ja näüdäti trääsä. Hõigati: poiskõsõkari, sõita võit, a kaitsõ pankõ pääle!» tulõtas Kaha Kaido miilde.
Suurõ pido väiku veli
Et võrripäävä peräst joba võimõndusõ, lavva, liiklusmärgi vällä omma säetü, sis om mõistlik noid ka tõõsõ pido jaos tarvita, löüd kõrraldaja.
Õdaku tulõ säälsaman lõõdsasimman, midä tetäs joba 11. kõrd. «Mamastõ lõõdsasimman om suurõ Põlva lõõdsafestivali Harmoonika tsill’okõnõ veli.
Pidol om kats jako: kõgõpäält kontsõrt, kon egä lõõdsamiis ja kapell saa üles astu. Ütenkuun mängitäs ka Põlva Harmoonika ütidse luu läbi. A tõnõ jago om tands ja takanajaminõ, mängvä ansambli Mahmõr ja punt nimega Jokk,» kõnõlõs Kaha Kaido.
Rahmani Jan
Võrrimiis om uma pilli käümä saanu. Pilk Marga Janeki videost
