Puulpäävä, 10. piimäkuul peeti Ihamarun kümnendät Kõivualutsõ laata. Ja kuigi timahava om Postitiis kutsutu vana Võro-Tarto tii pääl mitu silda remondin, tulliva nii müüjä ku ostja ilostõ paiga pääle ja laat läts’ ekämuudu kõrda.

Mille müüjä ja ostja seo laadu pääle tulõva? «Olõ saanu säänest vastakostust, et seo om nigu keväjäne Lindora laat. Müüjile ja ostjilõ miildüs taa meeleolu. Oldas var’oliidsi puiõ all, inemise saava tiiviirt pite jalota ja om hoobis tõistmuudu tunnõ ku mõnõ platsilaada pääl,» kõnõlõs Täpsi.

Nii oll’ ka timahava hulga rahvast kokko tulnu. Päält ostmisõ sai kaia-kullõlda kultuuriprogrammi: üles asti Kanepi karmoskamängjä, rahvamuusigaansambli Suits ja Kool. Vahepääl kõnõli ummi tähelepandmiisi laadust Laheda muti, kiä omma perämäidsil aastil saanu piaaigu Kõivualutsõ laadapäävä maskotõs. A suurt herevüst teküt’ ka puukujjõ oksjon.

Puukujjõ oksjonilõ olli pantu vikursaagjidõ laagrin «Postitee puupäevad» valmis meisterdedü kujo. Tego om tõist aastat säälsaman Ihamarun peetävä kolmõpäävädse laagriga, kon nii alostaja ku edesijõudnu vikursaagmisõ huvilidsõ saava oppi puukujo tegemist ja noid opmisõ käügin ka valmis meisterdä. Üte valmissaanu puukujo and egä osalinõ Kõivualutsõ laadapäävä oksjonilõ.

Oksjon läts’ ka timahava kõrda ja kõik kujo löüdsevä hindäle vahtsõ umanigu. Kõgõ kallimbat hinda masti suurõ mõtsapingi iist: tuu müüdi maaha 1850 euroga.

A miä and jõudu Postitii pääl suuri üritüisi kõrralda? «Ma elä tan! Ja tunnõ, et Postitii köüt nigu ütidse jõõna naid inemiisi, kiä tan veeren eläse. Seo om rahvas, kiä tund rõõmu ütenkuun tegemisest. Nii om ka Kõivualutsõ laadapäävä kõrraldamisõ man joba selge, kiä midä tege. Väega hää kuuntüü om seo kümne aastaga tegünü,» löüd Täpsi Aivar.

Postitii ja tuu kandi tegemiisi kotsilõ saa inämb teedüst internetiaadrõsi postitee.ee päält.

Rahmani Jan

Nigu laatõ pääl iks kombõs, saiva huvilidsõ laskõ hinnäst hobõsõga sõiduta. Rahmani Jani pilt

Laheda muti umma etteastmist uutman. Rahmani Jani pilt

Puukujjõ oksjon. Rahmani Jani pilt