17. ja 18. piimäkuul peetäs Vahtsõliinan 27. maarahva laatu. Päält suurõ müügipido saa laadu pääl kaia ja kullõlda hulga etteastmiisi ja näütüisi.
Eräle keelekastmisõ uulidsa pääl omma välän käsitüüjuukõ tegijä, kogokunnauulidsa pääl pakva paigapäälidse seldsi ja talo umma talokraami. Vahtsõliina piirkunna põllumehe toova näütüsele uma vana ja vahtsõ põllutehniga. Tulõ ka rammumehe ja rammunaasõ võistlus ja nii suurõ ku latsõ pidävä maaha kablakakmisvõistlusõ. Viil saa kaia pinnenäütüst.
Mõlõmbal pääväl käü laadulava pääl kultuuriprogramm, kon timahava andva lisas paigapäälitsile tegijile tuuni mitmõsugumaidsi rahvuskultuurõ seldsi. Väliskülälise omma tandsja Lätimaalt Gulbenest.
Tõist aastat om laadu pääl ka eräle latsiala, kon meisterdedäs, mängitäs ja tsehkendedäs. Timahavanõ vahtsõndus om tuu, et tetäs ka latsi uma laat, kon latsõ saava kaubõlda hindä tettü söögikraami ja käsitüüga. Täpsempä laadu kavva saa kaia internetist lehe maarahvalaat.ee päält.
UL
Pilt mineväaastadsõ Vahtsõliina laadu päält. Pilt kodolehe maarahvalaat.ee päält
