Üüpäiv tüüpäiv – niimuudu või üldä timahavadsõ Võro perimüstandsu festivali kotsilõ, kon pia kõik tegemise proovitas üte üüpäävä sisse är mahuta.
Festivali programmijuht Mähari Kadri seletäs, et otsus tetä festival üte üüpäävä seen tull’ tuuperäst, et festivali vahtsõ noorõ juhi tahtsõva alostusõn pido kõrraldamistõ sisse ellä. Lisas om mitmõpäävälidse festivali kõrraldamist tagasi hoitnu maailma poliitilinõ olukõrd: tõisi riike rühmä ei julgu sõa peräst pall’o reisi.
A mõni vällämaa-rühm jõud seogi kõrd festivalilõ. «Omma tulõman bretooni, kiä oppasõ ummi tandsõ. Tulõva lätläse uma toreda ansambliga, näidega üten tandsimi läti perimüstandsõ. Lisas tulõ Leedu lõõdsavirtuoos Marma Vilius, kiä kõnõlõs lõõdsaseminäril Leedu lõõtsast ja mäng tandsus. Olõmi üten kutsnu ka paikligu udmurdi, kiä eläse Tal’nan, a tulõva oppama udmurdi tandsõ,» kõnõlõs Mähari Kadri.
Peris suur hulk om tulõman Eesti tandsurühmi, noidõ hulgan tunnõtumba rahvatandsurühmä Tuurit-Tuurit ja Leigarid.
Päält tandsu om programmin tähtsä kotussõ pääl lõõdsamäng ja peetäs maaha kombõperine lõõtspilli võikimängmine. Süvembält saa lõõtspilliga tutvust tetä väikul seminäril, kon lisas Leedu lõõdsamehele näütäs Võromaa Teppo lõõtsa ja mängmiskombit Ojasaarõ Toomas.
Midä tähendäs Võro perimüstandsu festival tandsurahva jaos? «Mullõ paistus egä aasta kõrrast inämb, et Eesti tandsurühmä omma seo sündmüse hindä jaos löüdnü. Meil om väega pall’o tandsurühmi, kiä käävä joba mitmõndat aastat ja ütlese, et tan om väega hää, esiki parõmb ku mõnõl välämaa-festivalil. Noid tandsurühmi, kiä ei olõ viil mi mano jõudnu, om veidü,» löüd Mähari Kadri.
Peris 24 tunni kõrrast tandsurahvas iks seokõrd tandsma ei piä. Vahepääl omma ka kontsõrdi ja jutujalutuskäügi. Ja nigu õks, peetäs liinauulitsidõ pääl laata. Timahava om vahtsõnõ tuu, et keskliinan om üts uulidsajupp tettü söögiuulitsas. «Mi murõ om joba pikembät aigu tuu, et festivali aol tulõ liina hulga võõrit inemiisi ja nä omma olnu tsipa nõvvulda, et söögikotussõ omma täüs. Nä omma hädän olnu, et ei olõ saanu kohegi istma ja süümä minnä. Seo aasta olõmi seo lahendanu niimuudu, et teemi söögiuulidsa Jüri uulidsa lõigu pääle Vabadusõ uulitsast kooni Tarto uulitsani. Sinnä om kirja pandnu ütsjago põnõvit söögitegijit.»
Kuigi festivali vallategemine ja lõpõtus omma seokõrd väega varra hummogu, päävänõsõmisõ aigu, julgustas Mähari Kadri rahvast noist ossa võtma, selle et plaanin om hulga põnõvit tegemiisi. Festivali vallategemisel loetas ette «Kalõvipoiga», tandsitas, kullõldas Sepä Silveri hummoguüminät ja Treieri Märdi juttu. Lõpõtusõl süvväs pannkuukõ. «Meil om festivali pääliku Möldri Kerttuga väiku plaan kah, kuis mi meelütämi rahvast hummoguni vasta pidämä, a tuud mi viil vällä ei ütle,» jääs Mähari Kadri salatsõs.
Timahavanõ Võro perimüstandsu festival «Ööst öhe» peetäs 8. hainakuu päävänõsõmisõst 9. hainakuu päävänõsõmisõni. Ligembät teedüst saa kodolehe vorufolkloor.ee päält.
Rahmani Jan
Võro perimüstandsu festivali programmijuht Mähari Kadri. Rahmani Jani pilt
