Paiklikku perimüskultuuri, inemiisi, lugusid ja luudust tähtsäs pidäjä Rõugõ kandi festival «Aigu om!» kand sõnomit aigladsõmbast elost. Timahava peetäs festivalli kolmõl pääväl.
Edimäne päiv, 21. hainakuu om Pähni mõtsapäiv. Tuu päävä tegemise omma Pähni kandin, päämidselt külästüskeskusõ ümbre vai mõtsan. Kavan omma mol’otaminõ, Palo Timoga mõtsankäümine, tüütarõ Otsa Raheliga, Piiri Aini pildinäütüs, kunstnik Sepsivarti Uku soolakujo vallategemine ja räppar Sammalhabe kontsõrt mõtsa kõlakodadõn.
Tõõsõ päävä, 22. hainakuu sündmüse omma Viitinän, kon saa kullõlda Reiteri Merle ja Vunderi Eva-Lotta laululatsi kontsõrti, kaia puukujjõ tegemist, tetä hõpõehtit ja muud. Tuu päiv peetäs ka kalapüügivõistlust «Viitinä kuurits». Õdaku om Viitinä kõrtsi küünün kontsõrt, kon astva üles kiränik Koffi Indrek ja muusik Raska Katariin ni õdagu lõpus and Kalkuna Mari uma vahtsõ plaadi esitlüskontsõrdi.
Kolmanda päävä, 23. hainakuu tegemise omma Rõugõn. Sääl saa kunstikuuri tüütarrin üten lüvvä, rahvamajan psühholoog Treiali Kadri juttu kullõlda ja muusikidõ Karu Sandra Eowyni ja Liiva Carlosõ kontsõrdilõ üten ellä. Festivali aol om esi paigun valla ka näütüisi ja kodokohvikit.
Festivali «Aigu om!» om uman kodokandin ello kutsnu muusik Kalkuna Mari. Ligembät teedüst ja kavva saa kaia kodolehe aiguom.ee päält.
UL
