Seo nätäl tetäs Rõugõ muinastalo man kõvastõ kirvõtüüd. Valmis plaanitas meisterdä tankandin tarvitusõl olnu muistinõ vii pääl sõitmisõ ruhe.
Niisama lahastas palkõ, selle et päävä ja vihma purõtu kisklavva muinastalo katussõ pääl tahtva vällävahetamist. Kohendõdas ka aida ruukatust. Külälise saava kõkkõ tuud uma silmäga kaia ja uudista.
Tüünädäli lõpun 15. hainakuul peetäs muinastüütarri päivä, kon Edeva Eremiidi puutüükooli opipoisi näütäse noorilõ, kuis vanastõ puutüüd tetti.
Samal aol kõnõlas Tarto Ülikooli arheoloog Rammo Riina, kuis vanastõ püstüdside piili pääl kangast tetti, Rannamäe Eve kõnõlõs lambist ja tuust, kuis villa ja langa saadi. Püstkuan küdsä meistrikokk Mihkelsi Epp muinasaoliidsi pidosüüke.
UL
