22. ja 23. hainakuu pääväl peeti Kangstin kodokandipäivi. Egä viie aasta takast saava Sännä ja Varstu vaihõlõ jäävide külli inemise kokko jakapipääväl, et pitä meelen uma kandi aoluku, inemiisi ja kaia, midä põnõvat tandsu- ni laulurühmil selges om opit. Jakapipääväl tuuperäst, et Vana-Roosa kerigupühä om joba piä 17. saandist olnu jakapipäiv, ku tulti kerigu manu kokku laatu pidämä.
Puulpäävä säädse rahvas hinnäst Naadi vana kõrdsi manu tsõõrikplatsilõ, kon sai mängi, piirakit süvvä ja kullõlda Saarõ Evari ettekannõt Kangsti kandi kotussõnimmist. Egän lava pääl üles astnun kollõktiivin löüdü mõni inemine, kiä Kangsti kandist peri – tuud ka nuuri lauluansamblin Vikat, kes Otsari Silja juhendamisõl üles astsõ. Õdaguhämärüsen sai simmanil ansambli Parvepoisid perrä jalga keeruta.
Visseli Mallõ kõnõl’ lava pääl luku, kuis mõisnik Vana-Roosa jakapipäävä pidustuisi är ollõv tahtnu keeldä, selle et kipõ rüäpüürdmise aig oll’ käen. Parhilla säänest murõht es olõ, a pidoplatsi päält oll’ vaia läbi sõita suurõl kombainil ja viläkäruga traktoril, nii et peris põllutegemisest putmalda elo viil õks ei käü.
Pühäpäävä näüdäti pidolidsõlt Vana-Roosa kalmuaia väretit, mis üle hulga ao vahtsõs oll’ tettü. Tuud vidi iist Kangsti küläselts üten Visseli Mallõga ja raha saadi Rõugõ valla ütenhaardvast rahaplaanist. Vinne aigu oll’ surnuaia värde peris maaha lahutu, a tuu jaos, et muinsuskaitsõ lubanu vahtsõt ehitä, oll’ vaia vanast värtest õigõt pilti.
Visseli Mallõ kõnõl’, et pilti vanast värtest oll’ peris rassõ löüdä. Kül kuulutõdi niisama ja internetin, kooni lõpus löüti üts pilt Johansoni Maidu albumist, kon oll’ pääl ravvast kaariga Vana-Roosa kalmuaia väret. Tuu pildi perrä tekk’ kujumeistri Uibopuu Paul vahtsõ värte. Tüüd alostõdi joba minevä sügüse, a talv tull’ pääle, nii et peris valmis sai seo suvõl. Kõik huvilidsõ saava nüüt ette võtta retke Vanna-Roosa ja tuu üle kaia.
Seo sügüse saa 130aastadsõs Vana-Roosa kerik, mink man seol pühäpääväl peeti maaha ka keriguplatsi laat. Kuiki müüdi veidükese tõistsugust kraami ku vanast, oll’ tuu kotus maakivist kerigu man ja Mustajõõ luha veeren piaaigu samasugunõ nigu vanast.
Saarõ Hipp
Küläplatsi pääl peetült pidolt sõitsõ läbi kombain. Saarõ Hipõ pilt
Vana-Roosa surnuaia vahtsõnõ väret. Saarõ Hipõ pilt
