9. süküskuu pääväl peeti Tsooru rahvamajan 17. küläpillimiihi päivä. Säändside päivi pidämine sai algusõ Oravalt Pähnä Külli iistvidämisel.

Sisseharinuid kokkusaamiisi om peetü mitmin küläkotussin. Kolm viimäst aastat om pidu kõrraldamist vidänü Kangsti küläselts. Seokõrd lei kampa ka Tsooru V-klubi, kiä lava väega ilusalõ põhupallõ-nardsuvaipuga är ehtse ja muud muudu avit’.

Pillimängjiid oll’ himuga kullõma tullu hulga rahvamuusika avvustajid. Näile mängse 45 pillimiist ja -naist, nii ütsindä ku kambaga. Pääle Võru- ja Põlvamaa pillimiihi oll’ mängjid tullu Saarõmaalt, Tal’nast, Raplamaalt, Läänemaalt, Põltsamaalt, Villändist.

Pillimängjiid tulõ egä aastaga manu, a vaheldus kah õks. Egämehekontsõrdil tull’ manu mitu vahtsõt mängjät ja paar vahtsõt puntigi, nigu Mõtsakohhin ja Kanepi Karmooniku. Nigu kõgõ, sündü ka kohapääl vahtsit puntõ ja lämmä vastavõtmisõ osalidsõs sai noorõ rahvamuusigu Duo Tuusast. Lõõdsalegendi Lindmetsa Harri Võrumaalt ja Mägi Sulev Saarõmaalt jagasiva noorõmbilõ ummi lõõdsamängunippe ja esimuudu tiidmiisi. Ma esi opsi vahtsõt võrukiilset laulu «Ummamuudu maa» ja anni sõna kah kõigilõ üten.

Kõgõ noorõmb mängjä oll’ Merilo Oliver Läänemaalt, kelle juurõ omma Sännän. Timä lõõdsaoppaja om Visla Enrik Mehkamaalt. Kõvva plaksutõdi Pihu Alolõ ja Käärmani Reinolõ Pulga Jaani kuulsa «Mul om unistus» ettekandmisõ iist. Tõist aastat rõõmust’ meid Krabi kandi pillimiis Uusmaa Tarmo, kiä kõlasi uma täämbädse ao helisäädmega varustõt karmoškal nigu täüsorkestri.

Pidu laabu kinäste ja lõppi ilosa kuunmänguga.

Visseli Malle

Tsooru rahvamajan toimunu 17. küläpillimiihi päiv lõppi ütenkuun mänguga. Pilt V-klubi FB lehe päält