Täämbä (21. süküskuud) om sügüsene madissõpäiv, miä om pühendet apostli ja evangelist Matteusõlõ. Tõnõ madissõpäiv (24. radokuud) om pühendet tõsõlõ apostlilõ, kedä kutsutas Mattias. Mi traditsioonin omma kats nimme kokku sulanu. Madis, Mati, Mats, vanõmba traditsiooni Matu ja mitma tõsõ omma häste levinü, ollõn nii edenime ku ka talunimmi ja priinimmi alussõs. Näütüses priinimel Madisson om 353 kandjat.
Evangelist Matteusõ nimega õkva üttemuudu om priinimi Matteus, minkal om Eestin 71 kandjat. Seost nimest om Eesti perekonnanimeraamatu käsikirän kirutanu Kallasmaa Marja.
Võrumaal panti priinimi Matteus Urvastõ kihlkunna Kärgula mõisan. Nime saajit oll’ õigõ mitu perekunda, kiä ellivä katõn Leondi talun, miä olli tõnõtõsõst kavvõdal, üts Haamastõ külän, tõnõ Hänike kandin. Haamastõl olli nä Leondi Kaspre ja Jüri perrätulõja, tõsõn Leondi talun Aadami ja Juhani perrätulõja. Seo om ka täämbädsel pääväl arvada kõgõ suurõmb Matteusõ suguvõsa, arhitekt Matteusõ Arnold oll’ seost suguvõsast peri. Määnegi köüdüs om olõman priinime Matteus ja talunime Mõtusmäe vahel, a et tuu talunimi om noorõmb ku priinime, kirja pant tallõ kruntmisõl 19. aastagasaa kesken, sõs olõ-i tuuga asi selge. Või olla, et talulõ nime andnu *Mõtusmägi oll’ varahampa määnegi pühäkotussõ nimi köüdüssen Matteusõga? Vai vastapiten, tsirgunimetüs mõtus tõlgõndõdi pühämehe nimes?
Viil panti priinimi Matteus Kudina mõisan Põh’a-Tartumaal ja Kullamaa kihlkunna Liivi mõisan Läänemaal. Viimätsen kirutõdi 1835. aastaga perekunnanimmi pandmisõ raamatulõ Mateus, a keriguraamadu näütäse nimme Matteus. Nelläs kotus, Laitse mõisa Nissi kihlkunnan, om nii mõisakirän ku keriguraamatun päämidselt nimekuju Mateus peritolukotus.
Üts nimekuju om viil Mattheus, minkal om Eestin katõssa kandjat. Seo või olla ümbre kujunu Matteusõst, a vähämbält üts perekund om tsaari-aigu Eestimaalõ tulnu Lindeni mõisast, miä või olla Liepkalne parhillatsõn Lätin. Ka nimekujuga Matteus inemisi om Liivimaa Läti poolõ päält Eesti poolõ pääle rännänü.
Piibli nimme Matteus kirutõdas saksa keelen Matthäus, inglüse keelen Matthew. Heebreä originaali või lukõ näütüses kujul Matitjahu, nime tähendüs om ’jumala (Jehoova) and’. Ka tõnõ apostli Mattias, kiä valiti apostlidõ hulka pääle Iskarioti Juuda vällälangõmist, kandsõ põhimõttõlidsõlt samma nimme, vahetegemine om kujunu kerigu aoluun. Matteusõ tõnõ nimi oll’ Leevi. Kas Leevi-Matteus om ka periselt piibli Matteusõ evangeeliumi autor, tuu om üts küsümüs, minka üle teoloogi ja keeletiidläse kavva pääd murdsõva. 19. aastagasaast pääle om selge, et timä vahtsõ tõstamendi edimädse evangeeliumi autor joht olõ ei. Timä nimi panti manu prestiiži nõstmisõs.
Saarõ Evar
Rubriigin kõnõldas perekunnanimmi periolõmisõst ja tähendüsest.
