28. rehekuu pääväl pidä Mõnistõ talorahvamuusõum 75. sünnüpäivä. Tuul pääväl tetäs pidolidsõlt vallalõ muusõumi pikäaolidsõ juhataja Tulviste Hele mälehtüspink, kullõldas Kõivupuu Marju loengut, muusigu andva kontsõrdi, kaias näütüisi ja süvväs torti.
Päävä alostusõs tetäs keskpääväl vallalõ Tulviste Hele (1952–2022) mälehtüspink. «Hele tüüt’ tan 34 aastat. Tuu om olnu perädü suur energiä, midä Hele siiä muusõumilõ pand’. Parhilla omma muusõumitunni peris hariligu, a Hele naas’ noid kõrraldama joba 1995. aastal. Ka jõuluaignõ Päkapikumaa, miä om mu jaos suur fenomen ja minka om egä aasta olnu köüdetü hulga paigapäälist rahvast, om Hele ja Mõnistõ mõtskunna vällä märgitü,» seletäs Mõnistõ muusõumi juhataja Rüütli Airi.
Tulviste Hele mälehtüspink pandas katõ varatsõmba muusõumijuhi, Lepä Alfredi ja Kengi Pauliine mälehtüspingi vaihõlõ. Noidõ pinke tegemist ja välläsäädmist võtt’ kats aastakka tagasi iist Tulviste Hele. «Helel oll’ iks määnegi vaimnõ köüdüs varatsõmpi muusõumi juhtõga. Näide pildi olli täl tüütarõn ja tä nigu olõs näidega nõvvu pidänü. No saa timä pink näide pinke vaihõlõ, tegünes mõttõlinõ kolmnukk, kon Hele saa Alfredi ja Pauliinega juttu aia,» kõnõlõs Rüütli Airi.
Pink tetäs Mehkamaal kasunust tammõpuust ja meistre om Rattasepä Andres, kiä om tennü ka kats edimäst pinki.
Päält pingi vallategemist om pääväkavan Mõnistõ kandist peri tiidläse Kõivupuu Marju loeng Mehkamaast rahvaperimüsen. Kaia saa ka näütüst ristipuiõst ja sünnüpäävä jaos kokko säetüt näütüst, miä tuu vällä inemise, kiä muusõumi tegemiisiga läbi ao köüdedü omma olnu. «Inemise omma kõgõ tähtsämbä. Taha, et võimalikult pall’u muusõumiga köüdedü olnuid inemiisi löüdnü tii sünnüpääväle,» kuts Rüütli Airi.
Mõnistõ talorahvamuusõum om Eesti kõgõ vanõmb ja lõunapoolitsõmb vabaõhumuusõum. 22. rehekuul 1948 tull’ Lepä Alfredi iistvõtmisõl kokko kodoluu-uurmisõ selts, minkast kasvi vällä Mõnistõ muusõum. «Mi kogun omma päämidselt lähkümbäst ümbrekunnast peri as’a,» kõnõlõs Rüütli Airi.
Sügüsedsel ja keväjädsel aol omma muusõumi suurõmba tegemise koolilatsilõ mõtõldu opipäävä, niisama käävä koolilatsi grupi muusõummi kaeman. Inne jõulõ tetäs muusõumi mano Päkapikumaa, timahava tulõ seo joba 27. kõrd. Suvõl käü rohkõmb rännüseltskundõ ja muid uudistajit ja muusõumirahval om suvitsil nädälivaihtuisil hulga välläsõitõ esi opipäivi ja tüütarriga.
Muusõumi tegemiisi kotsilõ saa teedüst kodolehe monistemuuseum.ee päält.
Rahmani Jan
Muusõumi juhataja Rüütli Airi näütäs paika katõ varatsõmba pingi vaihõl, kohe pandas mälehtüspink pikäaolidsõlõ Mõnistõ muusõumi juhatajalõ Tulviste Helele. Rahmani Jani pilt
