Tõsõpäiv, 10. rehekuu. Päiv varrampa om sotsiaalmeediäst läbi käünü, et Mõnistõ koolin tulõ päiv, kon loetas luulõtuisi, mängitäs jalgpalli ja kommõnteeritäs tuud. Uman keelen. Spordi- ja luulõmiis Contra tulõ küllä. Uma Lehe toimõndaja mõtlõs, et tuust võinu reportaaži kokko kirota.
Välläkuulutõdul aol om Mõnistõ kooli ümbre vaikus. Õnnõ kleenukõnõ tütärlats vidä ütsindä suurt võimõnduskasti staadioni pääle.
Majan seen om siski elomärki kuulda ja nätä. Omgi Contra! Latsõ istva põrmandu pääl ja Contra kah. Tä lugõ luulõtuisi. Siski paistus, et luulõtusõ väega suurt huvvi ei paku. «Ku pikk om olnu su kõgõ pikemb joosudistants,» tulõ küsümüs kullõjidõ siäst.
Õigõ pia tetäs otsus: läämi vällä jalgpalli mängmä! Karatas pistü ja joostas staadioni poolõ. Tutvusta tii pääl Contralõ umma plaani taast kõgõst reportaaþ tetä. «Väega hää, Uman Lehen omgi maru vähä spordist juttu,» saa tsipakõsõ kriitikat.
Contra ja tuu tütärlats, kiä veeränd tunni iist võimõndust staadioni viirde vidi, saisva mikrofoni man. Tulõ vällä, et tütrik om ettevõtmisõ vällämärkjä ja kõrraldaja, kooli 7. klassi opilanõ Giannakaina Elpida-Marie. Ilm om nigu pallimängu jaos luudu: päiv paistus, a väega lämmi kah ei olõ. Võistlõja tegevä lämmistüshar’otuisi.
No om jõudnu staadioni viirde ka sporditunni oppaja Tammõ Virve, kiä nakkas õkva kõrraldama. Virve hoit mikrofonist kavvõndalõ, selle et täl om niigi kõva helü. Kats kaptenit saava valli hindäle võistkunna ja tulõ vällä, et kummangi om 15 mängjät. «Naa omma supõrvõistkunna,» kommõntiir Contra harilikumbast suurõmbat võistkunda. Plaan om sääne, et kuigi Contra piät vahepääl mängu kommõntiirmä, lüü tä platsi pääl kah üten, selle et päämine om iks pallimäng, mitte seletämine.
No om aig võistkundõ nime vällä märki. Verevide hammidõga võistlõja omma FC Kuudsi (Mõnistõ kuul om Kuudsi külän), a tõõsõ võtva hindä nimes Võrumaa Tugõva. Pall lüvväs mängu.
Reportõrilõ nakkas hirm pääle tulõma. Midä kaema piät? Misasi om sulusais? Ma ei tiiä jo jalgpallist midägi!
Jalgpall Mõnistõ kooli palliplatsi pääl om tävven huun. Ründäjä Contra om hengega nii mängu man, et kiil tüküs suust vällä. Laube Kadri pilt
A mäng käü platsi pääl tuust huulmada. Paistus, et FC Kuudsi om ründävämb puul. Ja nii juhtuski õigõ pia, et lüvväs väreht. Kuudsi juht 1:0.
Contra juusk vahepääl mikrofoni mano ja seletäs, et no pruuvva Võrumaa Tugõva viiki tetä. Ja juusk platsi pääle tagasi. Tä esi om Võrumaa Tugõvidõ võistkunnan, tuuperäst tunnus kommõntiirminõ kah tsipa sinnäpoolõ kaldu. A vast tuu õnnõ paistus nii.
Võrumaa Tugõva lääväki ründämä ja õigõ pia om sais viigin: kujotõldava tabloo pääle ilmusõ numbrõ 1:1. FC Kuudsi lätt vahtsõst ründämä. Pall vahetas pia egä löögiga võistkunda.
Silmä nakkas sääne asi, et mäng om aigladsõmbas jäänü. Mõni mängjä satas vahepääl pikäle, a aja hinnäst jäl kipõstõ pistü. Kiäki küsüs kellä, a vastust ei saa.
Pall käü üte värehti mant tõõsõ mano, a sais ei muutu. Kooni jäl Kuudsi ründäs ja saisus saa 2:1. Contra juusk mikrofoni mano. «FC Kuudsi sai punkti tenu ründäjä Contra jämmele vialõ kaitsõn!»
Vahepääl om palliplatsi viirde mängu kaema tulnu Rõugõ vallavanõmb Vahteri Britt. Tä kõnõlõs sporditunni oppajaga paar sõnna ja kaos niisama kipõstõ, ku om ilmunu. A seo jutt vist jalgpalli pall’o ei putu.
Contra lüü värehti. Sais om 2:2. Mängitäs viil, sis andas Kuudsi võistkunnalõ nukalüük, miä puulkogõmada väretile satas. Sais om 3:2.
Mäng om jäl huugu täüs. Paistus, et edimädsest väsümisest platsi pääl om üle saadu. Ka väikumba mängjä saava vahepääl palli hindä kätte.
No om aig puuli vaihta. Ja õkva pääle tuud juhtus tuu, midä juhtuma ei piä: Võrumaa Tugõva löövä umavärehti. Arvada ei olõ puulivaihtus viil peräle jõudnu. Sais om 4:2.
Oppaja ütles, et mängu lõpuni om 11 minotit. Kuudsi klubi ründäs. 5:2. Tsipa ao peräst tulõ viil üts väreht. 6:2.
Contra inämb kommõntiirmä ei jõvva. Pall om äkki jälleki värehtin. Vaiõldas, kas oll’ post vai väreht, a otsus tulõ sääne, et sais om 7:2.
Kuudsi võistkunnan nakkas silmä üts kõva mängjä nimega Raven. Sporditunni oppaja saat timä värehtile, et tõõsõ kah mängi saanu. Mängitäs, tulõ viil nukalüüke, ründämiisi, pallikaotust. Sis andas teedä: aig!
Ku Contra ütles mikrofoni, et lõpusais om 8:2, om mul tsipa imähtämist. Kuna tuu katsas väreht lüüdi? Tuud ma siski küssü ei julgõ, lää küsü parõmb, misasi om sulusais ja mille tuust es kõnõlda.
«Taan mängun es tulõki sulusaisu,» and Contra alostajalõ spordireportrilõ perämädse nõnanipsu.
Rahmani Jan
Kõrraldaja Giannakaina Elpida-Marie:
«Kotun oll’ ikäv ja tull’ sääne mõtõ. Edimält tahtsõ pikembät laagrit tetä, a imä ütel’, et tekku ma edimädses lühemb üritüs.
Mi koolin om jalgpall maru popp. Mõtli, et võinu olla mõni kuulsa inemine, kiä jalgpallin üten saa lüvvä. Ja õkva tull’ Contra miilde. Imä avit’ sis ka Contra nõuhtõ saia.
Mullõ täämbäne mäng miildü. Kõik tulli peräle, es pelgä Contraga üten mängi. Aituma koolirahvalõ avitamisõ ja ütenlüümise iist.
Edesi om plaanin viil mõni sääne päiv tetä, et kutsu mõni kuulsa inemine mi rahvaga sporti tegemä ja kultuurist kõnõlõma.»
Giannakaina Elpida-Marie. Rahmani Jani pilt
