7. joulukuul jõud Võro liinan Kreutzwaldi muusõumin püüne pääle MTÜ Müüdud Naer vahtsõnõ tiatritükk «Uni nihutab piire». Lavastaja Tagametsa Tarmo om tuu kokko säädnü Kaplinski Jaani loomingu ja eloliidsi juhtumiisi perrä ja võtt luubi ala kunstiinemise süütundõ ütiskunna ja tõisi inemiisi iin.

«Naksi taad asja vallalõ arotama Salumetsa Thomasõ monograafia «Kujuneda sunnita. Mõistmaks Jaan Kaplinskit» perrä. Lavastusõ konfliktikotussõs sai luulõtaja ku kunstnik ja arginõ naanõ timä kõrval. Uuri tuud, et ku luulõtajast ja mõttõtargast miis om nõstõtu veidükese korgõmbalõ, sis ku rassõ vai kerge om säändse inemise kõrval ellä,» paotas Tagametsa Tarmo tsipakõsõ vahtsõ lavastusõ ust.

Kas püüne pääl saa nätä ka luulõtaja Kaplinski Jaani tegeläskujjo? «Peris maaha ei kopeeri, a ärtuntavit asju om. Meil ei olõ lava pääl üts Kaplinski, om kats Kaplinskit. Tego om unõnäoga, mõlõmbalõ Kaplinskilõ om ütte-tõist lubatu,» seletäs Tagamets.

Tükün mängvä Troll’a Agu, Seimi Agur, Purgasõ Ane ja rahvamuusik Mängli Janne, kiä tege ka muusikalidsõ kujondusõ.

Timahava mängitäs tiatritükkü kolm kõrda, a Tagametsal om plaanin tulõva aasta keväjä poolõ taad viil mängi ja võiolla tüküga Eestit pite rändämä kah minnä.

Rahmani Jan

Pilt proovisaalist: näütlejä Trolla Agu luulõtaja rollin. Tagametsa Tarmo pilt