Eesti Energia saat’ kirä: vahtsõst aastast nä inämb arvõ saatmisõ ja muu as’aajamisõ man Eesti nimme ei pruugi, omma edespite Enefit. Ma väega võõrit kiili ei mõista, a mu jaos tulõ tuu vahtsõ nime man köüdüs sõnnoga energiä ja lahja, vai sis tõõsõ sõnaga kehväpoolinõ. Mõistminõ hindä viku üle naarda näütäs muidogi tugõvust, a uma riigi nime häbendämine tuud joht ei näütä.
Uma keele ja kultuuri häbendämine ärinimmin om Eestin võtnu peris pandeemia mõõdi. Umal aol, ku Tal’na tehnigaülikuul TalTechi nime võtt’ ja nigu buldoosõriga kõigist mõistligõst vastaväüdüssist üle sõit’, ütli ma, et tulõ aig, ku Eesti Vabariik võtt hindäle nimes EsRep. Tuu om jo hulga lühemb, suuperätsemb, riikevaihõlidsõmb, avitas parõmbalõ lajan ilman läbi lüvvä.
Jah, EsRep. Soovida tuud nimme lukõ taasperilde, selle et sinnäpoolõ paistus olõma kimmäs tsiht võetu.
Rahmani Jan,
Uma Lehe päätoimõndaja
