MTÜ Vana-Võromaa Käsitüü om vällä hõiganu vahtsidõ kaupu ja meelüsside luumisõ konkursi «Minkastki midägi». Konkursilõ oodõtas innekõkkõ minkagi vahtsõstpruukmisõst sündünüt käsitüüd, miä om köüdet Vana-Võromaaga.
Oja Vilve om tähele pandnu, et näütüses rõividõ vahtsõstpruukminõ om moodun noidõ nuuri siän, kiä massikaupa ei taha. «Noorõ käävä taaskasutuspuutõn, säält om odavamb osta ja tuu juht näid umblõmisõ mano kah. Tahtminõ olla stiilne ja ummamuudu sund otsma lahendust, kuis vanalõ midägi mano panda ja ümbre ummõlda. Vanõmbal põlvkunnal omma nuu tiidmise alalõ, a tähtsä om tuud nuurilõ kah opada,» löüd tä.
Üts võimalus käsitüütiidmiisi inämb avvu sisse nõsta om säändside käsitüükonkurssõ kõrraldaminõ. Timahavanõ konkurss om Vana-Võromaa käsitüüliisil joba kuvvõs. Varatsõmpi konkurssõ teema omma olnu «Savvusann», «Aigu om!», «Mõtsa poolõ», «Kirjun om väke» ja «Latsõlik ja lustilinõ». Ummi kogõmuisi perrä tiid Oja Vilve soovita, et käsitüüas’a võinu olla väikumba ja odavamba, noid ostõtas parõmba meelega ku suurt ja kallist käsitüüd.
Konkursilõ passisõ tüü, midä olõ-i varramba vällä näüdät vai joba müümises tett. Märki tasos tuu pääle kah, määndse paki sisse asi panda, selle et konkursilõ esitedüid asju saa anda müüki Vana-Võromaa Käsitüü esindüspuuti, e-puuti UmaPuut, laatu pääle, muusõumipuutõhe vai näütüs-müükele. Lisas plaanitas konkursitöid näüdädä Võro liina Ideekuan Vana-Võromaa käsitüüesindüsen suvitsõl näütüsel.
Ligembät teedüst käsitüüesindüse ja konkursi kotsilõ saa kodolehe ideekoda.ee/loovmeistrid/ päält.
Rahmani Jan
MTÜ Vana-Võromaa Käsitüü vidäjä Oja Vilve Ideekua käsitüütarõn. Rahmani Jani pilt
