Loomingu Raamadukogo om vällä andnu umaaolidsõ Krümmeri kooli oppaja Eisenschmidti Heinrichi raamadu «Mälestusi Krümmeri õppeasutusest Võrus».

Ku Võro liina aoluku kõnõldas, märgitäs kõgõ är, et 19. aastasaal oll’ Võro teedä-tunnõt koolitarkusõ andmisõ kotus. Krümmeri eräkuul nimmatas kimmäle är ja kooli kotus näüdätas kah är: tuu om sis täämbä Võromaa muusõumi maatükk.

Ma esi mäletä 1970. aastidõ alostust, ku vana maja oll’ viil alalõ ja tedä nimetedi tondilossis. Navi latsõ käve sääl inne koolibussi pääle minekit turnman.

Kuis elo sääl kuulsan koolin käve, tuust oll’ varrampa veidemp tiidä. Kooli vilistlanõ Fet-Sensini Afanassi om umin mälestüisin tsipakõsõ seost koolist kõnõlnu. Ja nüüt – üllätüs, üllätüs – om poodiletin tenoväärt tõlgõ Krümmeri kooli oppaja Eisenschmidti sulõst. Tõlkja om auväärt eloaignõ kerigukooli oppaja Kuusõ Ene.

Väega hää lugõminõ om. Kõnõldas nii koolin oppamisõ kõrrast ku tsipakõnõ Võro liinast ja tuust, midä tan ümbretsõõri tetä saa, määne om luudus jne. Egäl juhul and lugõminõ inämp aimust, määne elo meil 19. aastasaal võisõ vällä nätä. Aiteh viil kõrd provva Enele ümbrepandmisõ iist!

Padari Ivari

Padari Ivari pilt