Müüki omma tulnu timahavadsõ Uma Pido piledi, näid saa osta Piletilevist. Kõgõ lihtsämb tii piledi ostmisõ paika jõudmisõs om kodolehe umapido.ee avaküle pääl.

Kuvvõs võrokeeline laulu- ja rahvapido Uma Pido peetäs 1. juunil 2024 Põlva Indsikurmu laululava pääl. Pido teema om seokõrd «Mäng», miä and võimalusõ tetä pidol nall’a ja vigurit. «Laulami, mängimi, lustimi ja hengämi ütenkuun! Tunnõmi lihtsähe rõõmu ja hoiami võrokõisi perändüst,» om kirän pido tutvustusõn.

Timahavadsõ Uma Pido lavastas Põlvast peri tiatrilavastaja Leesalu Diana. Tä plaan uma miiskunnaga lisas koorilaulmisõlõ lava pääle tuvva suurõjoonõlidsõ etendüse inemiisi ja puppõga. Pido kunstnigu omma Unduski Marion ja Miksoni Martin, liikmisjuht om Jõela Ingmar ja puppõ tegemiisi vidä Tõnissoni Taavi. Etendüse muusigapoolõ köüt kokko Varrese Ardo-Ran. Näütlejist astussõ pidol üles Mureli Hilje ja Mähari Andres.

Laulu poolõ päält löövä seokõrd Umal Pidol üten 3800 suurt ja väikeist lauljat, kedä tugõva viil solisti Kalkuna Mari, Contra, Hainsoo Meelika ja Meelis. Pido päädirigent om Joosingu Küllike. Muusikat tegevä saatõorkestri Jõgi Riivo vidämisel ja Karmid Torud Äniläse Piitre vidämisel. Simmanibänd om ansambli Kõhukesed.

Üten löövä viil tandsupundi Põlva Päntajalad, Hopser ja Veriora Vingerdi.

UL