Kreutzwaldi memoriaalmuusõumin, Mõnistõ talurahvamuusõumin, Karilatsi vabaõhumuusõumin ja Vana-Võromaa kultuurikuan om valmis saanu helügiid, miä and külälisele võimalusõ kullõlda eesti, inglüse ja võro keelen teedüst muusõummõ välläpanõkidõ kotsilõ.
«Küläline tulõ muusõummi, pildistäs uma nutitelefoniga kruutkoodi ja audiogiid nakkas kõnõlõma umbõs säänest juttu, midä hariligult kõnõlõs elon giid,» seletäs Võro instituudi muusõumiosakunna juhataja Lilosoni Kersti.
Egän muusõumin saa kullõlda ligi 30 paariminotilist helüjuppi. Jutu teema omma muusõumidõ kaupa erinevä: ku Karilatsin ja Mõnistõn saa rohkõmb teedüst huunist ja umaaolidsõst maaelost, sis kultuurikuan om inämb juttu aoluudokumentest ja sündmüisist ja Kreutzwaldi muusõumin saa teedüst Lauluesä ja Kalõvipoja kotsilõ.
«Mi muusõumi omma varrampa olnu rohkõmb traditsioonilidsõ ja hariligu. A täämbädsel aol piät küläliisi mano meelütämise jaos olõma rohkõmb interaktiivsust,» seletäs Liloson. Vahtsõ helügiidi andvagi säänest interaktiivsust mano ja lupasõ luuta ka muusõumihuviliidsi arvu kasumist. «Seo aasta om mi kandin Euruupa kultuuripääliina aasta ja või arvada, et rahvast tulõ Lõuna-Eesti kanti hariligust inämb. Usu, et ka muusõummõhe jõud timahava inämb küläliisi.» Lisas luut Lilosoni Kersti, et sääne asi lätt rohkõmb pääle noorõmbalõ rahvalõ, kiä juttu hää meelega umast nutividinäst kullõs.
Helüjuppõ saa kullõlda kolmõn keelen – eesti, inglüse ja võro keelen. Jupi omma kokko säädnü muusõummõ tüütäjä. Eestikeelist teksti lugõ Hinni Ene, inglüsekeelist Oetjeni Robert ja võrokeelist Tagametsa Tarmo.
Helügiidi valmistegemist tugi muinsuskaitsõammõt taotlusvoorust «Muuseumide kiirendi», miä omgi mõtõld tuujaos, et muusõumi saanu umilõ tegemiisile vunki ja täämbädse ao vurhvi mano anda.
Ligembät teedüst Vana-Võromaa muusõummõ kotsilõ saa internetist kodolehe wi.ee/muusoumi/ päält.
Rahmani Jan
Võro instituudi muusõumiosakunna juhataja Lilosoni Kersti näütäs Vana-Võromaa kultuurikuan mõtsavelli välläpanõki man, kuimuudu vahtsõ helügiidi tekste telefoniga kullõlda saa. Rahmani Jani pilt
