Et mul ei olõ lupõ, autot ja rahha, et autorollerit osta, sis piä ma bussiga sõitma. Sõida küländki tihtsähe. Hää, et sõit om seeni massulda olnu ja jääs vast edespite kah latsil ja vannol. A taal hääl as’al om tõnõ, halv külg kah.
Inemise, kellega mi kuun sõidami, ei olõ kõik kõrraligu. Arva, et meil siin Võro- ja Põlvamaal ei olõ inämb kodolda inemiisi, kõik iks eläse kongi. A hindä iho ja rõividõ puhtusõ iist külh kõik huult ei piä. Kas um sääl sis süüdü lohakus vai viinaputõl.
Ja ku sääne haisukott, kes om parajalõ puulkainõ vai pohmellin, bussi tulõ, sis pitsitä nõna kinni vai istu õkvalt kavvõmbahe. A haisu om iks kõik buss täüs. Ja ku tä viil köhis ja tatitas kah, nii et kõik pisiläse lakja lindasõ, ei olõ tuu sukugi hää.
Säädüs ütles, et ku inemine om silmäga nätä pur’on, om bussijuhil õigus tedä mitte pääle võtta. A säändside kottalõ, ku mõni om must ja haisas, ei olõ määnestki säädüst. Ütskõrd küsse sääne juhi käest piletit ei tiiä kohe. Ütel’, et välän om külm ja tä taht tsõõri üten sõita, et bussin om lämmämb. Istsõ bussijuhi taadõ ja naas’ kõva helüga kõnõlõma ja mörrämä. Mul naas’ õkvalt bussijuhist hallõ, et tä piät terve tii toda kullõma.
Ma olõ kül vist rahvavainlanõ, ku julgu niiviisi mõtõlda, et ku sõit olõssi kasvai poolõ hinnaga, sis vast kül nii pall’o kasimada inemiisi ümbre ei sõidassi. A mis näil prõlla vika, mugu istu bussi lämmäle. A ega bussi ei olõ kah kõik lämmä. Olõ sõitnu nii Tarto, Võro ku Põlva bussõga ja piä ütlemä, et kõgõ külmembä omma Põlva bussi.
Ku koolilatsõ ja pensionääri saava massulda ja tüüinemine piät masma, sis om tuu riigile väega väikene tulu. Pall’o noid tüüinemiisi iks bussiga sõit. Ja ku paar kõrda är sõitva säändside kasimalda inemiisiga üten, saagi ütistranspordi-iso otsa.
Kellel om auto, sõit iks tuuga edesi. Auton istut ütsindä vai uma perrega, kes omma hoolitsõdu ja puhta.
Ei hiidütä tuu automass kah kõiki. Ku iks käüt tüül ja saat palka, jõvvat massa kah. Tuu tege inämb-vähämb sama vällä, kas massat piledi vai kütte iist. Mitmõkõisi sõitõn tulõ vast kütte iist eski vähämb massa ku kõigilõ pilet osta.
Tuuga olõ ma peri, et autit om väega pall’o. A mis tetä, ku autoga om mugavamb ja puhtamb, midä ei saa bussisõidu kottalõ üldä.
Urmi Aili
