Mõni päiv enne, ku rahvas riigi sünnipääväl lipsu ette sääde, pandi Mõnistõ päästekomando mehe uma piduliku vormi sälgä ja kutsõ külalise kattõ juubõlit pedämä.
Mõnistõn asutõdi vabatahtlik pritsimehi ühing 1929. aasta veebruarin. Pääkorter oll’ pritsikuur konagitse Mõnistõ raudtiijaama lähkül, konh oll’ tuul aol pall’u rahva ja vajalikkõ asutuisiga asula.
Tuust alustamisest saije 95 aastat. Mõnistõ sovhoosi aigu oll’ kah keskusõn vai mõisan, nigu siin alasi om ültü, vabatahtlik tulõtõrjõ olõman. Aga 1993. aasta sügüselt naksi neli palgalõ võet miist päästeteenistüse Mõnistõ tugikomandole valvõruumõ ehitämä ja kuu ao peräst sai joba nakada põhitüüd tegemä. Nii et nüüt võisõki petä ka kohaliku kutsõlise päästekomando 30 aasta juubõlit.
Aktusõl kõnõli Lõuna päästekeskusõ juht Tähe Tagne ka tuust ammutsõst aost, ku vahtsõl ühingul oll’ ütsainumas käsiprits ja aastõid es olõ kõrralikku maiagi, aga tuu iist tegüsi mõnõ aasta peräst, ku pritsimehi jo enämb, kõva seltsielu. Oll’ pasunakuur, mängiti näidendiid ja tandsiti.
Tammõ Jean, kiä om põra Mõnistõ ja Antsla päästekomando päälik, kõnõli, et nimä muiduki nii ilma tehnikalda ei olõ ollu ja esi ehiti henele ruumi, mis oll’ suur tüü, a seltsiellu om vähämb. Siski ei olõ tuugi olõmalda. Näütes lätläisist päästjäidega saias häste läbi ja peedäs alasi suvõl kuun perepäivä.
Nii Jean kui viil mitma Mõnistõ päästemehe omma taa tüü pääl vähämbält tõist põlvõ. Ku poiskõnõ tõnõkõrd esä tüü manu üten tulla sai, tull’ taal huvi tehnika ja sääntse tüü vasta, konh hääd kehalist vormi ja julgust vaija. Üts sääne nuur miis, kel esä kõrvalt ammat miildüma naksi, om Tiitusõ Henri, kelle aktusõl Elupästjä III klassi medal üle anti. Aasta iist oll’ Henri tuld kistutaman Võru lähkül ja oll’ teedä, et inemine om majja tulõ ja suitsu kätte jäänu. Tõsõ pästjaga üten lei aknõ purus ja läts’ suitsu sisse ka Henri ja tõi vällä inemise, kiä kiirabilõ üle anti ja ellu jäi.
Tuulsamal Mõnistõ pästjäide pidupääväl sai Zilmeri Kaino, kiä siinsaman Mõnistõn umal aol päästjänä tüüd alust’ ja põra Võru-Põlvamaa päästepiirkonna juhataja om, Eesti Vabariigi presidendi käest Eesti Punatsõ Risti IV klassi teenetemärgi.
Muiduki om Mõnistõ rahval hää miil, et mi uma päästemeeskond nii asjalik om ja näide tüüd tähele pandas. Ja vääga suur asi om ka tuu tiidmine, et abi om nii lähkül, ku medä hätä peas olõma.
Nõlvaku Kaie
Tiitusõ Henri sai julgõ teo iist aumärgi. Tiitusõ Merle pilt
