Kats timahavast Euruupa kultuuripääliina – Tarto Eestist ja Bodø Norrast – teivä ütidse ettevõtmisõ, miä avitas väikeisi kiili ja kultuurõ nuuril ütsõõsõga parõmbalõ tutvas saia.
Tarto ja Bodø kuuntüüprojekt om mõtõld mõlõmba kultuuripääliina ümbre olõvidõ väikeisi kiili-kultuurõ nuuri ütehhaardmisõs ja kuuntüüle härgütämises.
Eestist võtva tegemiisist ossa mulgi, seto ja võro noorõ ja Norrast saami noorõ. Käütäs ütstõsõl külän ja arotõdas, mille väikeisi kiili ja kultuurõ hoitminõ om tähtsä ja kuis tuu mõotas nuuri hindätiidmist. 14. mahlakuul peeti Tarton Eesti poolõ nuuri tutvassaamisõ ja plaanipidämise seminäri, kon umast kultuurist kõnõli ka võro noorõ.
Võro noorõ Vodi Sirlen, Saarõ Hipp ja Oro Meeli näütäse nuuri tutvassaamisõ seminäril, mink poolõst võrokõsõ esierälidse omma. Laanõ Triinu pilt
