Opilaisilõ mõtõld ja Adsoni Arturilõ pühendet luulõlugõmisvõistlus tulõ kesknädäli, lehekuu 8. pääväl (8.05) kell 11 Sännä kultuurimõisan. Hää luulõlugõja saava avvohinna.

Võistlusõl võiva luulõtuisi lukõ kõigi Vana-Võromaa kuulõ ja latsiaidu latsõ. Egä lugõja kand ette üte pala – Adsoni Arturi vai mõnõ tõõsõ kirotaja võrokiilse luulõtusõ. Lugõmisõ pikkus ei või olla üle viie minodi ja luulõtus piässi olõma pään.

Hindaminõ käü nellä vannusõrühmä perrä: latsiaia ja 1. klassi latsõ, 2.–4. klassi, 5.–9. klassi ja 10.–12. klassi opilasõ. Egäst latsiaiast ja koolist oodõtas ekkä vannusõrühmä kattõ ütsikut esinejät vai sis ütte kooni viie liikmõga rühmä.

Ossavõtmisõst üten täpsembä teedüsega lugõja kottalõ (nimi, vannus/klass ja kuul/latsiaid, oppaja, luulõtusõ päälkiri ja kirotaja) tulõ teedä anda Võro instituuti (tel 517 5174 vai kadriugur@wi.ee) ildampa 3. lehekuu pääväs (3.05).

Adsoni Arturilõ (1889–1977) pühendet umakeelidse loomingu ettekandmisõ võistlusõ mõtõ om edimäst suurt võrokeelist luulõtajat miilde tulõta. Edimäne luulõlugõmisvõistlus oll’ Sännän 1999. aastagal Adsoni 110. sünnüaastapäävä avvos.

Seo aasta om plaanin ka tsill’okõnõ tüütarõ Adsoni luulõtuisi parõmba mõistmisõ ja lugõmisõ kottalõ.

Päivä kõrraldasõ ja tugõva Võro instituut, MTÜ Sänna Kultuurimõis, Eesti Kultuurkapital ja OÜ Isejutt.

UL