Timahavadsõ Uma Pido püüne pääle om üten lauljidõ, tandsjidõ ja näütlejidega uuta ka mitund mõõti puppõ. Noid liigutasõ pupinäütlejä.
Et pido teemä om mäng, om üts jago etendüsest ka pupitiatri. Pupiliigutajilõ opas’ puppõga ümbrekäümist professionaalnõ pupõnäütlejä ja -lavastaja Tõnissoni Taavi.
Üts seo pido pupinäütlejä om Lepassoni Kadri, kiä om inämb tunnõt ku rahvamuusik ja pillioppaja. Kuis tä pupinäütlejäs sai? «Mullõ kirot’ Leesalu Diana ja kutsõ kihäpuppõ liigutama. Mi olõmi ammutsõst aost tutva, koolisõsara, klassisõsara, ellimi samal uulitsal, nii et tiiämi ütstõist väikust pääle. Diana otsõ tandsjit inemiisi, selle et kihäpuppõ liigutamisõ jaos piät kihätunnõtus olõma keskmädsest parõmb. Olõ tennü latsõpõlvõn võistlustandsu ja rahvatandsu, suurõn tegelnü perimüstandsuga, nii et mul om küländ suur tandsjataust. Ka tõõnõ kihäpupi liigutaja Kängsepä Siim om rahvatandsja,» seletäs Lepassoni Kadri.
Edesi läts’ lugu nii, et vahtsõ pupinäütlejä kaiva pupõ üle ja naksi noidõga tüüle. «Kaimi puppõ, nuu olli väega ägedä. A hindäl jo määnestki ettekujotust es olõ, kuis ja mis, tuuperäst tundu edimält säändside kihäpuppõga tüü ka tsipa hiidütäv. A juhendaja Tõnissoni Taavi om äge, täl mõtõ tüütäs kipõstõ. Alostusõn teimi tehniliidsi asju, kuis puppõ liiguta ja esi liiku. Säält edesi naksimi kaema, kuis mi lavastustõ passimi,» kõnõlõs Lepassoni Kadri.
Kuimuudu sis vahtsõ as’a opminõ siiämaalõ lännü om? «Targõmbas ma olõ kimmähe saanu, inne es mõista midägi. A amatööri tunnõ om kõik aig. Kõik, midä Taavi ette näütäs, om hää ja õigõ, a ku esi proovit, sis ei küünü viil häste tollõni, midä vaia. A Taavi om hää oppaja ja julgustaja.»
Midä Lepassoni Kadri seolt Umalt Pidolt uut, luut ja pelgäs? «Ooda väega ilosat pito. Olõ nännü tsipa pruuvõ, kõik tõotas tulla illos, äge, innenägemäldä. Ma looda, et kõigil inemiisil, kiä pito tegevä – kõrraldaja, tandsja, laulja –, om väega torõ. Ja ma arva, et nuu, kiä läävä pito kaema, saava säält tagasi pall’o rohkõmb, ku etendüse iist mastu pilediraha väärt om. Tsipakõsõ pelgä viil uma esinemise väikuid var’onduisi. Om pall’o asjo, mis tulõ miilde jättä. Õnnõs om viil tsipakõsõ aigu. Pidonädäli proovi omma iin, nii et usu, et mu osa kinnistüs kimmäle tuu aoga.»
Rahmani Jan
Kihäpuppõ proovisaal Indsikurmun. Lepassoni Kadri ja Kängsepä Siim kihäpuppõ takan, näid oppas Tõnissoni Taavi. Rahmani Elo pilt
