Seod nimme kand Eestin 66 inemist. Viil om olõman vanan kiräviien nimekuju Mähhar kuvvõ kandjaga. Nimi panti õnnõ Räpinä kihlkunna Veriora mõisan. Hingõlugõmistõ 1826 kirutõdi vanan kiräviien, a lõunaeesti muudu: Mähhär. Nime saaja olli kolmõ velle perre: Mähä Piitre ja Peedo Pääsnä külän ni Mähä Jaan Pahtpää külän. Sündünü olli nä tegeligult Haavapää külän, kon ellivä viil 1795. aastagal, näide esä Toomas oll’ tuun hingelugõmisõn kirän ku är pagõnu (Vinnemaalõ lännü?).
Kuigi Mähä lisanimi levisi Pääsnä küllä küländ ilda, 1800 aastaga paiku, sai seost Räpinä jaos erilidselt kimmäs muutumalda talunimi. Mähä talu ostsõva perises Küütsmanni (Kütsmann), eestistämisel võti nä nime Kivisild, a Kivisilla perre «külänimi» (küläkeeline kutsminõ) om iks Mähä.
Alguperätselt om Mähari nime saanu Mähä hõim peri Süvähavva küläst, sääl om iks viil tunnõt küläosa nimega Mähäots. Sama hõimu üten tõsõn harun panti priinimi Mähard (Mähhärd), miä om vällä koolnu. Viil tulõtõdi Räpinä kihlkunnan Mähä lisanimest priinime Mähhats, Mähhäkar ja Mähhäson, ka nuu nime omma vällä koolnu.
Eesti perekunnanimeraamadu käsikirän om nimest Mähar kirutanu Uibo Udo. Timä pakk, et Lõunahummugu-Eestin hariligu talunime Mähä alussõs võissi olla mõni vinne mehenime mugandus, nigu om ka soomõ nimmiga Mähönen, Mähkönen jt. Näütüses Mähö < Makarios vai Mehvo < Mefodi. Ku kaia Mefodi (Мефодий) slaavi muudu muganduisi Mefa, Mehha, Mehhedja jt, sõs tundus sääne asi usutav külh. A muiduki om võimalik, et Mähä lisanimi om saad ka sõnast mähk vai vana võru keele muudu üteldült mäih, umastavan mähä. Tuu om sõs kõo, lepä vai pedäjä koorõalunõ makus kiht, midä vanast keväje kaabitsõdi ja süüdi.
Eestistämisel oll’ Mähariga köüdüssen muutmisi õnnõ kats. Veriora vallan võeti ütel kõrral vahtsõs nimes Piiroja. Huvitav om eestistämisel võetu nime Mähar vana nimi Mähkong. Samast Kullamaa Piirsalu mõisa nimest tulõ ka ette varjantsõ Mäkong ja kõgõ varahampa (1834) Mähköng. Vast om sõs mõtõld põh’aeesti sõnna mäeküngas, mitte suurt Aasia jõkõ Mekong?
Saarõ Evar
Rubriigin kõnõldas perekunnanimmi periolõmisõst ja tähendüsest.
