24. põimukuu pääväl peetäs Võro liina 240. sünnüpäävä tähistüses Kubija laululava pääl maaha üts suur üütandsupido üten näütemängu, valgus-show, rahvamuusiga ni koorilauluga. Kõik kokko kand päälkirja «Paganlik PärimusÖÖ».
Õdak nakkas pääle kell säidse jalutuskontsõrdiga, kon käüdäs üten segäkooriga Hilaro läbi Kubija mõtsaaludsõ. Peräst tuud mängitäs lava pääl vällä Juhansoni Jaanika püüne pääle säet tiätri- ja tandsutükk «Õnnemärgi all sündinud», miä jutustas lugusit Jaigi Juhani tondijuttõst. Sääl lüü üten nii ammõdi poolõst näütlejit ku kotussõpäälitsit näütemängusõpru, kõik jutt aetas võro keelen. Üten löövä näütüses Tauli Anu, Pijoni Silva, Lüüsi Kristjan, Seimi Agur jt. Kunstilinõ juht om Udrasõ Maire.
Päält lavastusõossa lätt edesi tands ni trall mitmõ kirmaski pääl, saa nätä tulõtrikke Lätimaalt ni tandsi Nedsaja külä bändi perrä.
Uma leht küsse lavastaja Juhansoni Jaanika käest lavastusõ kottalõ inämb.
Mille om tuu festivali muudu üritus nimmat just paganligus perimusüüs?
Päämädselt selle, et Vanapakan om lava pääle tulõva luu päätegeläne. Tõsõst külest tuuperäst, et toomi lavastusõga vällä rahvaperimüslist ja mitmit kavvõst aost peri lugusit ni tegeläisi, miä võivaki olla eelkristligu vai paganligu. Ütesõnaga omma keskpunktin põrgulisõ egäl kujol ni karvan.
Kuis Jaigi Juhani tegeläse tuu jaos pasva?
Jaik om kohaligu jutuvestja ni kirämehenä tankandi rahvalõ parõmbidõ tunnõt, a kavvõmbal mitte nii väega pall’o. Timä teksti andva edesi Võromaa perimüse tagapõhja ja sobisõ tan mängmises häste: ütest külest tulõtasõ taa kandi inemiisile miilde noid lugusit ni tegeläsi ja tõsõst küles näütämi tuuga Võromaa kirändüst ilmarahvalõ.
Mille tullit Võromaalõ lavastama, miä tan köüt?
Süvembä juurõ omma mul hindäl kah peri Vana-Võromaa ala päält, a köüdüs om kakõnu, nii et nüüd om hää miil, et lavastaminõ pakk jäl põhjust siiä käümä tulla. Huvi heräsi taa kandi vasta joba ülikooliaol, ku hää oppaja Kõivupuu Marjuga kävemi tan mitmõl suvõl kogoman rahvaluulõt ni perimüst, miä and’ väega hulga mõttit. Teimi tuul aol eski üte perimüse-teemälidse näütemänguvõigõlusõ. Ja parhilla om kuuntüü ja vastavõtt taa kandi kultuuritegijide puult olnu kah ütlemäldä hää.
Saarõ Hipp
Segäkoor Hilaro tege Otsari Silja oppamise perrä mõtsaaludsõ kontserdi jaos pruuvi. Juhansoni Jaanika pilt
