Juulikuu lõpul sai aastakümneid Mõnistõ rahvamaja tüüd juhtinu Raa (Raagi) Kalju mälestüspink vahtsõ kotusõ rahvamaja iihn.

Mõttõ pääle tuua katõ aasta iist rahvamaja välipüüne pääle pant Kalju kuju ja pink maja ette platsi pääle tull’ MTÜ Mehkamaa Kultuuriselts üts iistvedäjeid Roobi Katrin, ja nagu taal kommõ om, naksi huuga asja ajama, otsma häid ja virku inemiisi, kiä appi tullu. Om armõdu hää, et sääntsest rahvast ei olõ Mehkamaal puudus ja nüüd omgi hinnat kultuuritüütäjä kuju üten pingiga rahvamaja iihn platsi pääl.

«Mõnistõ rahvamaja viimätsel juhatajal Laube Kadril oll’ illus plaan tetä rahvamaja kõrvalõ Mehkamaa tunnõtuide-hinnatuide inemiisi mälestüses skulptuuripark. Rõugõ vallan tett kultuurireformi järgi ei olõ rahvamajul enämb juhatajaid ja Kadri plaan jäi katski. No tull’ mõtõ, et Kalju, kelle tüüd vääga hinnati, olõs rahval enämb silmä all,» kõnõl’ Katrin ja ütel’ suurõ aitüma kõigile, kiä tüü ärä tekki ja materjaliga aviti.

«Kujulõ and’ vahtsõ vällänägemise skulptor Andres Rattasepp, kiä taa katõ aasta iist ka tekk’. Alusõ tekki rahvamaja ette Mõttusõ Mait ja Märten ja Toropi Piitre. Materjaliga aviti Saru sõbra, kiä ennegi meile appi omma tullu,» kõnõl’ Katrin.

Üten Katriniga omma naile tänuligu kõik, kel Mehkamaa elu, kultuur ja näide alalõjäämine söäme järgi.

Nõlvaku Kaie

Mehkari rühmä tandsja tulõva enne pruuvi Kalju mant läbi. Nõlvaku Kaie pilt