MTÜ Vana-Võromaa Käsitüü kõrraldõdul konkursil «Silmäilo» sai pääpreemiä Štubise Urmas, kink käe all sündü tüü «Looduse mustrid» – puust höörigu ehtekarbi üten puust sõlgiga.

Karbikõisi ni sõlgi kirjasõ puiõ luuduslidsõ kirä, kattõ ütesugumast kirja ei trehvä. Egä karbikõsõ põh’a alt ni sõlõ tagaküle päält saa lukõ, mändsest puust om asi tett. Meistri mõtõ om luumisõ aigu liiknu suvidsõ suurõ laulupido mano. Rahvaligu mooduga rõividõ ilostusõs passis puust sõlg väega häste ja sõlõ tegomuud lupa seod kanda küländ mitmõsugumaidsi rõividõga.

Seokõrd anti konkursil vällä kats ütehääd tõsõ kotusõ preemiät, selle et kats konkursitüüd saiva ütepall’o hindamisõpunktõ. Suvõl tullõv laulupido om olnu ka Alla Helvel mõttõn ja tä tõi konkursilõ tsirgukõsõ päälkirä all «Iseoma» – vildist tettü tsill’okõsõ pidorõivin tsirgu, midä saa kanda kas prossi vai ripõndusõ muudu vai tetä hoobis võtmõhoitjas. Humala Ülle tekk’ kah rõnnaehtes esimuudu prossõ, mink man tä esi tõi vällä lihtsüst, a hindaja näi seo tüü man ka taipsa matõrjaalipruukmisõ tulõmit.

Eräpreemiä väärilidses hinnati Tuulemetsa Birgiti luuduid inneolõmalda ehtit ja mõiksat väelist vüükotti. Mõlõmba tegemisel om pruugit kallost peri matõrjaali. Üten Karula undruku joonikasõ rõivaga om mängu lännü pargit kalanahk ja kala sälgroodsu jaku, midä om käsitüün julõtu pruuki küländ harva.

Noorõ tegijä preemiä anti 12-aastadsõlõ meisterdäjäle Lauga Eliisele, kiä tekk’ valmis võtmõhoitja «Pääväkerä».

Konkursi võitja Štubise Urmas ummi võidutöiega. Oja Vilve pilt