Viiendäl Jaigi Juhanilõ pühendedül jutukõnõlamispääväl timahava 7. lehekuul anni Sännä kultuurimõisan kullõjidõ tujolõ pääle aholämmüse kütet nuuri jutukõnõlõjidõ nii raamatust löütü ku ka umaelolidsõ luu.

Uguri Kadri andsõ esi kah iinkujjo ja näüdäs’ ette, kuis üts jutt kullõjilõ eläväs kõnõlda ja kuis luku nigu langakerrä suurõmbas kerri. Rahva iin saisja ei tunnõ hinnäst sakõstõ kimmält, a hillätassa pruuvsõ päävä iistvõtja tuud etteastmisõ pingõt kah maaha võtta. Juttõ kõnõlama olli tulnu Haani, Mõnistõ ja Võro opilasõ.

Et õkva umast elost vai juhtumisõst kõnõlõminõ kullõjilõ esierälidselt süämehe lätt, näüdäs’ saalin kõrraldõt helüandminõ. Kõgõ parõmbas jutukõnõlõjas valiti Mõttusõ Katariina Mõnistõ koolist (oppaja Asta Pazuhanitš), kiä kõnõl’, kuis tä om pruuvnu paigapäälist poodimüüjät rahvaga võro kiilt kõnõlõma härgütä ja kuigi edenemist ei olõ seon as’an olnu, hoit tä luutust, et võro kiil kasus.

Pääle jutukõnõlõjidõ kutsuti kaejidõ-kullõjidõ ette 38. võrokeelitside kirätöie võistlusõ «Mino Võromaa» parõmba kirotaja. Kokko saadõti timahavatsõlõ võistlusõlõ 111 kirätüüd 11 koolist. Pääle Vana-Võromaa ja Setomaa tull’ töid Nõo koolist ja vällämaaltki. Kõgõ inämb kirätöid saadõti Põlva koolist, kirotama härgüt’ latsi eesti keele oppaja Ermeli Merili. Peris pall’o timä 3. klassi opilaisi olli kirotanu üten vanaimä ja vanaesäga näide nuurusaost. Arvada oll’ seo kuuntüü kah noorõmalõ põlvõlõ üts jutukõnõlamisõ opitunn.

Kokkovõttõn oll’ päävän parasjago vaeldust: jutukullõminõ ja sis preemiäsaajilõ plaksutaminõ, sis jäl kullõminõ ja plaksutaminõ. Kooni oll’gi käen krõnglisüümise aig.

Kabuna Kaile

Sännä kultuurimõisa saali jakku Jaigi Juhanilõ pühendet pääväl nii kullõjit ku kõnõlõjit. Laagi Johanna pilt

Võro Kreutzwaldi kooli esindäjä Jaigi-pääväl: takanrian Allasõ Tiia ja timä 6. klassi opilasõ Rästi Alexandra, Mustriku Marten ja Needo Oliver ja ederian Linnamäe Helena (häädkätt) 3. klassi opilaisi Kapi Raimondi, Valge Ramoni, Laureni Laura ja Henningu Joanna Mirelliga. Uguri Kadri pilt

«Mino Võromaa 38» parõmba kirotaja

 
1.–3. klassi vannusõrühm

1. kotus – Maido Naudi (Osola Põhikuul), «Pudrotego», oppaja Kristina Siska
2. kotus – Brayan Uibo (Põlva Kooli Tilsi maja), «Kuis mu vanaimä opsõ rattaga sõitmist» ja «Mu vanaesä sõprus tsirguga», oppaja Eve Hütt
3. kotus – Richard Puksa (Põlva Kuul), «Ku mu vanaimä lats oll’», oppaja Merili Ermel

4.–6. klassi vannusõrühm

1. kotus – Villem Sikk (Vahtsõliina Gümnaasium), «Mu lemmikkotus Võromaal – Kütioro kand», oppaja Külli Lendsaar
2.–4. kotus – Ebe Vodi (Rõugõ Põhikooli Haani maja), «Kiä ma olõ?», oppaja Kersti Leit
2.–4. kotus – Joel Kendra (Vahtsõliina Gümnaasium), «Võromaa vägimiis», oppaja Külli Lendsaar
2.–4. kotus – German Kõrran (Võro Kreutzwaldi Kuul), «Määnest väke (supervõimõt) ma hindäle himosta?», oppaja Tiia Allas

7.–9. klassi vannusõrühm

1. kotus – Ernst Jaak Liivat Uba (Rõugu Põhikooli Haani maja), «Ööbikuoro mägi», oppaja Kersti Leit
2. kotus – Mia-Lisete Erik (Võro Kreutzwaldi Kuul), «Orava – mu lemmikpaik Vanal Võromaal», oppaja Helena Linnamäe
3.–4. kotus – Laura Viilukas (Võro Kreutzwaldi Kuul), «Ütesä aastakka», oppaja Helena Linnamäe
3.–4. kotus – Lisanna Henning (Võro Kreutzwaldi Kuul), «Ma ja võro kiil», oppaja Helena Linnamäe

10.–12. klassi vannusõrühm

Pääpreemiä – Sigrid Ernits (Antsla Gümnaasium), «Ester», oppaja Iri Reile ja Liivia Rebane

Avvuhinnalauda tugõsi Eesti Rahvakultuuri Keskus (Vana-Võromaa perimüskultuuri tugõmismeede).

Eripreemjide saajit saa kaia ja parõmbit kirätöid lukõ Võro instituudi kodolehe wi.ee päält.