Eelijapääväl, 20. hainakuul, saiva kokko Tal’na võrokõsõ ja ma anni võro keele iistkõnõlõja (avvu)ammõdi üle Müürsepä Küllile.
Külli om Tal’nan süäme, meele ja mõistusõga võro keele ja meele hoitja, tähendäs – õigõ inemine võro keele iist kõnõlama. Tal’na võro selts om perädü uhkõ, et seltsist om nüüt joba neli võro keele iistkõnõlõjat ollu: Padari Ivari, Plumanni Kaja-Riina, Kõivupuu Marju ja nüüt – Müürsepä Külli.
Et mis ma sis esi võro iistkõnõlõjan kõrda saatsõ? Ei määnestki imet, a kõnõli võro keelen ja võro keelest, ku vähägi võimalus oll’. A tuud ma tii kõik aig niivainii ja tuu nii jääs kah! Mu hindä süäme ja meele jaos oll’ kõgõ lämmämb asi kuulda ummi võro keelen ültüid mõttit viimätsel laulupidul üten sääntside suuri mõtlõjidõga, nigu omma olnu Fred Jüssi, Marju Lepajõe, Viivi Luik, Lennart Meri jt.
Ah et eelijapäiv (vana kallõndri perrä 2. augustil) – suvi käänd sügüse poolõ. Haardkõ no viil suvõst, midä haarda and!
Kõivupuu Marju
Inneskine ja parhillanõ võro keele iistkõnõlõja ammõdi üleandmisõ pääväl. Pilt Kõivupuu Marju kogost
