Üsätäüs lillilist rõõmu ja hengetäüs illo kandva minno jaanipääväst ja laulupidost pääle läbi suvõ. Võro segäkoori Hilaroga käve laulupidol, a tii kooribussiga Tal’nalõ oll’ nigu seto tsimman. Päält Hilaro olli bussin Lapi naiskoori laulja ja sõsar-veli Setomaalt, kiä mu soovi pääle karmoskadõlõ helü sisse tõmpsiva. Lapi naisiga leimi tandsu ja kilgassimi kooni pääliinani. Neosama julgu Lapi naasõ lauli Tal’na ütistranspordin «Haani miist» nii, et kõik buss helisi. Hõissaa!
Eestimaa suvi om nii armõdu lühkü ja no, hainakuu lõpun, om joba mõrruv maik man, et õkva saa tä läbi. A seeni tulõ täst nii kõvastõ mõnnu tunda ku võimalik. Ma tiigi toda. Kats festivali pututi ja liiguti mu henge jälleki sügäväle. Neo olli ühendüse- ja tantrafestival.
Pääle noid om mul olnu tükk aigu täüdet tunnõ, kistumada naarahtus huuli pääl, nigu sis, ku olõt armunu. Seo om viinalda pur’on olõgi tunnõ, kon viina asõmõl om päiv, armastus elo vasta ja tuursokolaat. Seo tunnõ kand, ku olõt armunu elo sisse, olõt illos, lämmi, sügäväle hengäjä.
Jah, õkva tuu sügäväle hengämine om võti hääolõmistõ, selle et heng ja hengämine omma lähküle köüdedü ja hengämine avitas meil lõdvas laskõ ja ummi pinguisi veidembäs saia.
Ma olõ tenolik, et Eestin om nii hulga julgit ja mängoliidsi, hinnäst, ummi läbikäümiisi, umma seksuaalsust abarambas tetä tahtvit hengi, kiä mõistva hinnäst periselt lõdvas laskõ, tandsi nii, nigu kiäki päält es kaenu, laulda kõgõst süämest, kävvü sannan nigu muistõ, olla tävveniste paiga pääl ja tahta viil inämb kassu.
Tantristligu eestläse, ma olõ tii üle uhkõ! Loomuligult ka kõigi noidõ vällämaa esinejide ja küläliidsi üle, kiä Indiast, Ameerikast, Portugalist, Hispaaniast ja muialt siiä lindasõ, et saia suurõmbas ja vägevämbäs. Las elo linnada vahtsidõ suvitsidõ tuuli käen!
Olõ tantraga pia 20 aastakka köüdet olnu, alosti 2008. aastagal kursuisi tõlkmisõga. Olõ käünü vabatahtliguna Ibiza tantrafestivalil ja löönü üten India edimädsel tantrafestivalil. Ildamapa opnu terapeudis kah, tuuperäst taha ummi tiidmiisi, mõistmiisi ja pikält küdsänüt tarkust tollõ ala pääl jaka. Ku huvvi om, las tsiiva kandva meid kokko!
Lumiste Kati
Kiränik Lumiste Kati and värskit mõttit,
kuimuudu egäpääväello vaeldust löüdä ja märgotas tuust, miä parasjago süäme pääl.
