Minevä puulpäävä oll’ Maaritsa küläkeskusõ saal rahvast täüs: peeti kimmäs lõõdsakontsõrt tunnõdu lõõdsamängjä, Valgjärvel elänü Kikka Karla 111. sünnüaastapäävä meelenpidämises.

«Tuuperäst tulõmi kokko, et tä om olnu mi kandi kõgõ kuulsamb miis,» selet’ lõõdsakultuuri iistvidäjä ja pääväjuht Tartese Heino. «Tä om lõõdsa kuulsas mängnü ja mi kõik olõmi pruuvnu timä perrä timä lugusid mängi. Tä om meile näüdüs-lõõdsamiis olnu läbi aigõ, olõmi tan mitukümmend aastat timä mälestüst elon hoitnu.»

Mille Kikas om lõõdsamiihile tähtsä? «Kikas nakas’ raadion üles võtma ja mängse hinnäst rahva süämehe,» selet’ Tartes. Timä sõnno perrä jätt’ rahvas kolhoosiaol tüü poolõlõ, ku raadion tull’ saadõ, kon Kikka lugusid mängiti.

Timahavatsõl kontsõrdil asti üles nii alostaja ku tunnõtumba lõõdsamängjä. Pikembä kontsõrdi anni Indi Asso ja Mülleri Martin, kiä lauli üten lõõtspillega rahvaliidsi laulõ.

Päävä lõpõtusõs tull’ püüne pääle lõõtspillimängjide ütisorkestri, et ütenkuun muusikat tetä. Tartese jutu perrä tulõva pillimehe egä aasta Kikka Karla avvus mängmä hää meele ja suurõ tahtmisõga ja ka kullõja omma kõgõ kontsõrdi häste vasta võtnu.

Rahmani Jan

Lõõtspillimängjide ütisorkestri Tartese Heino (sais kuralpuul) iistvidämisel Maaritsa küläkeskusõ püüne pääl. Rahmani Jani pilt