8. märdikuul tähüstedi Puiga rahvamajan paigapäälse näütetsõõri 25. sünnüpäivä. Kava oll’ tihtsä: pääle Puiga-Vahtsõliina ütisnäütetrupi astsõ püüne pääle Sangastõ tiatri Rukki Narrid, jaeti tervitüisi ja tenokirju ja muidoki süüdi pidopääväkuuki.
2000. aastagal luudun Puiga näütetsõõrin om seo ao joosul üten tennü päält 20 esi vannusõn inemise. Ummi ülesastmiisiga omma nä paknu hääd aoviidüst umanuka ja kavvõmbidõ kantõ rahvalõ. Pidoõdagul mängiti üten Vahtsõliina trupiga Naeru-Lained etendüst «Kosja», mille om lavastanu Puiga näütetsõõri säsü Vijardi Külli.
Umalõ näütetsõõrilõ pühendümise ja harrastustiatri kombõ elonhoitmisõ iist sai Vijardi Külli Eesti Rahvakultuuri Keskusõ tenokirä kah. Sammamuudu tunnustõdi võrksa näütetsõõrin ütentegemise iist tenokiräga Rannula Annelit. Lämmä soovi olli Puiga tiatrirahvalõ pidopääväl üten võedu Võromaa arõnduskeskusõ kultuurispetsiälistil Valsi Kristil ja Võro valla kultuuritüü kõrraldajal Rosenbergi Maarikal.
Pidopäävä puhul sai kaia välläpanõkit näütetsõõri avvo- ja tenokirjust ja kiriväst pildikogost, miä kõik sälä taadõ jäänüt 25 aastakka elon avitasõ hoita.
UL
Üts ülesvõtõ Puiga näütetsõõri hällüpäävält. Lava iin saisva pikäaignõ näütlejä Lissmanni Mart ja trupi iistvidäja Vijardi Külli. Valsi Kristi pilt
