Piusa külästüskeskusõn saa nüüt tetä virtuaalsõ jalotuskäügi kuupõn, miä omma rahva jaos kinni olnu joba 2006. aastagast.
«Piusa kuupõ virtuaalnõ 3D-mutõl and mi küläliisile vahtsõ kaemisõnuka seolõ maa-alotsõlõ ilmalõ,» ütel’ külästüskeskusõ juhataja Keerdi Katariina.
Suurõ ekraani pääl saa lähkümbält kaia nii inneskiidsi kaivandamiisi jälgi ku ka luudusliidsi liivamoodustiisi. Säändsen mahun ülespildistämiisi ei olõ Eestin varramba viil tettü.
Ettevõtminõ om üts osa Võromaa arõnduskeskusõ projektist «Ligipääsetavus turismis», minka tetäs inemiisile, säälhulgan erivajaduisiga inemiisile lihtsämbäs turismikotusõlõ manopäsemine. Pääle Piusa kuupõ pututas projekt Tamula viiviirt, Rõugõ Ööbiguorgu ja Pokumaad. Ka
Piusan ei olõ kõik viil valmis: projekti iistvõtja Oru Astrid ütel’, et tüün om kumbatav koobakaart, miä lask nägemisviaga inemiisil tunda Piusa kuupõ räbästikku.
UL
Pilt Võromaa arõnduskeskusõ FB-lehe päält
