Timahavadsõ võro keele nädäli muinasjutuhummogu olli viiel pääväl Võro liinan Võro instituudi saalin. Jutukõnõlõja Lillmaa Terje kõnõl’ egä päiv mõnõ muinasjutu ja tekk’ pupitiatrit. Pildi pääl pidä Terje muinasjutuhummogut üten Sõlekese latsiaia ja Väike Werrone kooli latsiga. A päält muinasjutuhummogidõ peeti Võrol viil lauluõdagut, tetti mälomängu, kõnõldi reisijuttõ, oll’ arotuspäiv võro keelest ja võrokõisist ni mängiti ütenkuun savvusanna lavvamängu. Toomõ Triinu pilt

Tal’na Võro selts tähist’ timahavast võro keele nädälit pikembäle. Ettevõtmiisi alostõdi joba 2. märdikuul ja lõpõtõdi 8. märdikuul. Kutsuti küläliisi, peeti kohvitarrõ ja astuti üles võrokeelitside laulõga. Pildi pääl om nädäli lõpukontsõrt, iinlaulja Kolditsi Ellen, takanpuul ansambli Liiso. Plumanni Karja-Riina pilt

Põlvan tähistedi võro keele nädälit kohvikun Aal. Huviliidsi tull’ kokko nii hulga, et rahvas es taha häste ärki mahtu. Õdagul oll’ kolm jako: kõgõpäält näüdäs’ ansambli Kõhukesed umma vahtsõt lustilist laulu «Ohh esä» muusigavideot ja tuu perrä tekkü arotus, kuis üte kaadriga üles võetun filmijupin Mersu hinnäst vahepääl ümbre sai käändä. Edesi kõnõl’ keeletiidläne Jüvä Sullõv lühkü jutu Põlva kihlkunna keelest. Sulõvi ettekandõst tull’ vällä, et Põlva kihlkunna kiil om küländ harilik võro kiil, õnnõ väikeisi esieräsüisiga. Õdagu lõpõtusõs and’ ansambli Kõhukesed ummi võrokeelitside laulõ akustilidsõ kontsõrdi, kon suur jago laulõ olli tettü Pulga Jaani sõnno pääle. Pildi pääl omgi ansambli lauluhuun. Toomõ Triinu pilt