Ma kuuli raadiost, et eesti kirändüse pääväl loetas ütitselt uno Ööbiku juttõ, mille kirot’ Niidu Ellen nelikümend aastat tagasi. Uno Ööbik tekk’ kõkkõ tõistmuudu, ku suurõ mehe tuul aol võisõva tetä. Näütüses sõitsõ toukpöörä vai tõukõrattaga.
Ku katsakümnendil aastil oll’ tuu väega nal’akas, sõs viimätsil aastil tulõ liinah egä nuka pääl tõuksiga miihi vasta. Nii noorõmbit ku vanõmbit, pall’odõl om eski ülikund säläh ja lips iih. Mi võinuki noid toukpööräga miiha naada uno Ööbikus vai uno Sisaskis kutsma. Eesti kirändüse avvus.
